Colisium jáne IMX Shanghai halyqaralyq platformalary mýzyka ındýstrıasy salasyndaǵy yntymaqtastyq týraly memorandýmǵa qol qoıdy, - dep habarlaıdy alnews.
Kelisim Azıa jáne TMD elderi arasyndaǵy kásibı baılanysty damytýǵa baǵyttalǵan. Birlesken jobalar talqylanatyn alańdardyń biri Almaty bolmaq. Munda 20-21 qarasha kúnderi Markov kóshesi, 44 mekenjaıyndaǵy Almaty Creative keńistiginde Colisium Almaty konferensıasy ótedi. Bul týraly qalalyq Týrızm basqarmasynyń ókilderi aıtty.
Memorandýmǵa 29-31 qazan aralyǵynda Qytaıda ótken IMX Shanghai mýzykalyq forýmy barysynda qol qoıyldy. Taraptar konsert uıymdastyrýshylary, prodúserler, mýzykalyq leıblder men artıserdiń menedjerleri arasyndaǵy yntymaqtastyqty damytýdy kózdep otyr.
Konferensıada Qytaı mýzyka naryǵynyń qyr-syry, sheteldik oryndaýshylardy jergilikti aýdıtorıaǵa tanytý joldary jáne gastróldik konsertterdi uıymdastyrý tártibi talqylanady. Jıynǵa Japonıa, Ońtústik Koreıa, Ulybrıtanıa, AQSH, Reseı jáne Ózbekstannan kelgen sala mamandary da qatyspaq.
Baǵdarlamada mýzykany halyqaralyq platformalar arqyly taratý, shetelde konsert ótkizý, mýzykalyq leıbldermen jumys isteý jáne artıserdiń halyqaralyq festıválderge qatysýy sekildi ózekti máseleler qamtylǵan.
Bul kezdesý qazaqstandyq oryndaýshylar men prodúserlerge sheteldik mýzyka bıznesiniń ókilderimen tikeleı yntymaqtastyq jaıyn talqylaýǵa jol ashady.
Almatyda kreatıvti ındýstrıa salasynda 21 myńnan astam sýbekt jumys isteıdi. Mýzyka salasy – osy sektordyń mańyzdy baǵyttarynyń biri.
