Memleket basshysy Qasym-Jomart Toqaevqa Qazaqstan men Túrkıa arasyndaǵy dostyq pen iskerlik baılanystardyń nyǵaıýyna úles qosyp kele jatqan túrkıalyq ınvestor, «Ahsel Holdıń» dırektorlar keńesiniń tóraǵasy Ahmet Hamdı Aıan quttyqtaý joldap, elimizde júrgizilip jatqan reformalarǵa qoldaý bildirdi. Ol jańa Konstıtýsıa jobasy boıynsha ótken referendýmnyń sátti ótýin Qazaqstannyń turaqty damýy men jarqyn bolashaǵyna bastaıtyn mańyzdy qadam retinde baǵalady. Osy oraıda biz belgili kásipkermen suhbattasqan edik.
— Ahmet Hamdı myrza, Qazaqstandaǵy keıingi saıası reformalarǵa kózqarasyńyz qandaı?
— Qazaqstanda júrip jatqan ózgeristerdi árdaıym úlken yqylaspen baqylap kelemin. Memleket basshysy Qasym-Jomart Toqaetyń bastamasymen júzege asyrylyp jatqan reformalar eldiń ornyqty damýyna, qoǵamdyq kelisimniń nyǵaıýyna jáne zamanaýı memleket retinde ilgerileýine negiz bolady dep senemin. Eń bastysy, mundaı bastamalar qoǵamdaǵy turaqtylyqty saqtap, el azamattarynyń bolashaqqa degen senimin kúsheıtedi.
— Siz Prezıdent Qasym-Jomart Toqaevqa arnaıy quttyqtaý joldadyńyz. Buǵan toqtalsaq?
— Men Qazaqstan Respýblıkasynyń Prezıdentin Qasym-Jomart Toqaevty jańa Konstıtýsıa jobasy boıynsha ótken referendýmnyń tabysty ótýimen quttyqtadym. Bul – el ómirindegi mańyzdy tarıhı beles. Referendým halyqtyń el taǵdyryna beıjaı qaramaıtynyn, memleket bolashaǵyna jaýapkershilikpen qaraıtynyn kórsetti. Sonymen qatar, Qazaqstanda júzege asyrylyp jatqan reformalardyń eldiń jan-jaqty damýyna jol ashatynyna senim bildirdim. Bul qadamdar turaqtylyqty nyǵaıtyp, bereke-birlikti bekemdeı túsedi dep oılaımyn.
— Sizdińshe, Qazaqstannyń basty artyqshylyǵy nede?
— Qazaqstannyń basty qundylyǵy – el ishindegi tatýlyq, qoǵamdyq kelisim jáne túrli ult pen mádenıettiń ózara syılastyǵy. Osyndaı turaqtylyq pen ózara qurmet ahýaly memlekettiń damýyna da, ınvestısıa tartýǵa da oń áser etedi. Búginde Qazaqstanda kásip ashýǵa, bıznes júrgizýge barlyq jaǵdaı jasalǵan.
Ásirese qurylys salasyndaǵy ınvestorlarǵa memleket tarapynan naqty qoldaý tetikteri usynylǵan. Investorlarǵa jobalardy súıemeldeý, memlekettik organdarmen ózara is-qımyldy jeńildetý, ınvestısıalyq kelisimder jasaýǵa qoldaý kórsetý sıaqty sharalar qarastyrylǵan.
Buǵan qosa, Qazaqstanda halyqaralyq forýmdar men iskerlik kezdesýler turaqty túrde ótkizilip turady. Máselen, elde Kazakhstan Global Investment Roundtable sıaqty iri ınvestısıalyq alańdar uıymdastyrylady. Biz de mundaı is-sharalarǵa belsendi qatysýǵa tyrysamyz.
— Qazaqstan men Túrkıa arasyndaǵy baılanysty qalaı baǵalaısyz?
— Qazaqstan men Túrkıany tek ekonomıkalyq múdde emes, tarıhı tamyr, ortaq rýhanı qundylyqtar men baýyrlastyq baılanystyrady. Túrki elderiniń birligi – búgingi kezeńdegi mańyzdy faktorlardyń biri. Mundaı rýhanı jaqyndyq memleketaralyq qarym-qatynastyń bekı túsýine, saýda-ekonomıkalyq jáne mádenı yntymaqtastyqtyń keńeıýine jol ashady. Sondyqtan Qazaqstan men Túrkıa arasyndaǵy áriptestiktiń bolashaǵy zor dep bilemin.
— Siz Qazaqstanda uzaq jyldan beri jumys istep kelesiz. Bul elmen baılanysyńyzdyń máni nede?
— Qazaqstan – biz úshin tek iskerlik seriktes emes, baýyrlas el. Osy elde uzaq ýaqyt jumys isteı júrip, biz onyń damýyna, jańarýyna jáne halyqaralyq bedeliniń artyp jatqanyna kýá boldyq. Eń bastysy, Qazaqstanda alǵa umtylys bar, bolashaqqa degen aıqyn senim bar. Bul kez kelgen áriptesti jigerlendiredi.
— Qazaqstan halqyna qandaı tilek aıtasyz?
— Qazaqstan halqyna eń aldymen amandyq, birlik, bereke tileımin. El ishindegi tatýlyq pen turaqtylyq árdaıym saqtalsyn. Qazaqstan óziniń damý jolynda jańa bıikterge kóterile beretinine senemin. Osy oraıda Memleket basshysy Qasym-Jomart Toqaevqa ınvestısıa men kásipkerlikti damytýǵa qolaıly jaǵdaı qalyptastyrýǵa baǵyttalǵan saıasaty úshin alǵysymdy bildiremin. Baýyry bir, tilegi ortaq túrki jurtynyń yntymaǵy da arta bersin.
