Beıjiń, 2024 jylǵy 30 naýryz – Qazaqstan Respýblıkasy Premer-Mınıstriniń orynbasary – Syrtqy ister mınıstri Murat Nurtileý Qytaıǵa resmı sapary aıasynda iri qytaılyq kompanıalardyń basshylyǵymen kezdesýler ótkizdi. Kezdesý barysynda Qazaqstanda birlesken ınvestısıalyq jobalardy iske asyrý jónindegi josparlar talqylandy.
Qytaılyq bıznesmender Qazaqstanda júzege asyrylyp jatqan ekonomıkalyq reformalarmen, ınvestısıalyq saıasat pen preferensıalarmen, sondaı-aq elimizde bıznes júrgizýdiń artyqshylyqtarymen tanysty.
Qytaıdyń «Shandong Hi-Speed Group» memlekettik ashyq ınvestısıalyq kompanıasynyń ókilderimen kezdesý barysynda Qazaqstan-Qytaı qos saýda-ónerkásip parkin salý josparlary talqylandy. Qazaqstan tarapy osy baǵyttaǵy yntymaqtastyqty odan ári damytýǵa jáne jobany iske asyrýǵa jan-jaqty qolǵabys kórsetýge daıyn ekenin bildirdi.
QHR-daǵy et óndirý jáne dıstrıbýsıalaý jónindegi 1300-ge jýyq músheden turatyn eń iri ulttyq qaýymdastyǵy – «Qytaı et qaýymdastyǵynyń» basshylyǵymen Qazaqstannan mal sharýashylyǵy ónimderin eksporttaý máseleleri talqylandy.
«East Hope Group» dırektorlar keńesiniń tóraǵasy Lú Iýnsın kompanıanyń Qazaqstandaǵy birqatar jobalardy iske asyrý josparlarymen tanystyrdy. Bul qytaılyq kompanıa álemdegi eń iri elektrolıttik alúmını jáne alúmını totyǵyn óndirýshilerdiń ondyǵyna kiredi.
Qytaıdyń isker top ókilderi birlesken perspektıvalyq jobalardy júzege asyrýǵa úlken qyzyǵýshylyq tanytyp, qazaqstandyq seriktestermen tabysty yntymaqtastyqqa úmit bildirdi.
