Qazaq táttileri
Tátti irimshik
Qarapaıym bolǵanymen, dámdi de paıdaly taǵam. İrimshikke túrli tátti qospalar aralastyrý arqyly ázirlenedi. Elimizdiń ár bóliginde árqalaı: keı jerlerde bal, taǵy bir óńirlerde qant nemese tosap qosylady. Tátti irimshikti tońazytqyshta saqtaý kerek, sebebi bul - jaramdylyq merzimi qysqa taǵam.
Balqaımaq
Balqaımaqty jasaý úshin aldymen shıki qaımaqty aqyryn otqa qoıyp,bappen maı shyqqanǵa deıin qaınatady. Qant, bal, un qosyp aralastyryp, taǵy 8-10 mınýtqa tyndyryp qoıady. Daıyn bolǵan kezde baýyrsaqpen qosyp shaı dastarhanyna usynady.
Jent
Jent – talqannan jasalatyn ulttyq taǵam. Talqanǵa (qýyrylǵan bıdaı nemese arpa untaǵy) sút, maı, qant, bal jáne meıiz qosylady. Daıyn qospanyń tolyq sýyǵanyn kútip, ótkir pyshaqpen qalaǵan qalypta kesedi. Erterekte mundaı tátti taǵam dáýletti adamdardyń dastarhanynan ǵana tabylǵan eken.
Tiskebasar taǵamdar
Shı baýyrsaq
Shı baýyrsaqtyń úırenshikti baýyrsaqtan kólemi de, dámi de, qamyry da aıtarlyqtaı ózgeshe. Olar tuzdalmaǵan qamyrdan, sý qosylmaı pisiriletindikten uzaq ýaqytqa saqtalady. Sodan bolar, shı baýyrsaq jaýgershilik zamandarda kóshpendilerdiń urys-shaıqastarǵa alǵan jeńsik asyna aınalǵan. Shı baýyrsaq – Semeı óńiriniń betkeustar dámi. Tátti de qytyrlaq shı baýyrsaqty mundaǵy kez kelgen dúkennen jáne bazardaǵy naýbaıhanalardan taba alasyz!
Qurt
Qurt – tuzdalǵan súzbeni keptirý jolymen ázirlenetin qyshqylsútti taǵam. Onyń keptirilgen tuzdy qurt, qaınatylǵan qurt, qatyq sıaqty túrleri bar. Alyp júrýge qolaılysy - keptirilgen qurt. Qurttyń ózge túrlerine qaraǵanda onyń saqtalý merzimi de uzaǵyraq. Sonymen birge, halyq arasynda nárli sorpaǵa qurt qosyp ishý keń taralǵan. Qurt sorpaǵa qyshqyltym dám berip, erekshe tatymdy etedi.
Súr et
Súrleý – etti óńdeýdiń alǵashqy ári eń nátıjeli ádisteriniń biri. Súrlengen etti azdaǵan óńdeýden keıin taǵamǵa tutyna berýge bolady. Al súrlengen balyq aspazdyq óńdeýdi tipten qajet etpeıdi.
Súr et – júrek jalǵap alamyn deýshiler úshin keremet as. Onyń quramyndaǵy proteınder men mıkroelementter aǵzany jaqsy aýqattandyrady. Al súrleý ádisi ettiń jylýdyń áserinen búlinbeı saqtalýyn qamtamasyz etedi.
Joǵaryda atalǵandarmen qosa, mindetti túrde taba nan, súzbe, qazy, shelpek sıaqty til úıirer ulttyq taǵamdarymyzdan dám tatyp kórýge keńes beremiz!
Asyńyz dámdi, saıahatyńyz mándi bolsyn!
