Qala kúni aıasynda 18 qyrkúıekte Almatyda «Almaty: Bala.Art – Myń bala» atty aýqymdy qalalyq balalar pleneri ótedi, - dep habarlaıdy alnews.
Biregeı shyǵarmashylyq joba bir alańda 1000 jas sýretshini biriktiredi.
İs-shara saǵat 15:00-dan 17:00-ge deıin Dostyq dańǵyly, 124 mekenjaıyndaǵy Oqýshylar saraıynyń aldynda ótedi.
«Almaty: Bala.Art – Myń bala» – Almaty qalasy Bilim basqarmasynyń jańa mádenı-bilim berý jobasy. Joba balalardyń kózimen megapolıstiń tarıhyn, mádenıetin jáne zamanaýı kelbetin kórsetýge baǵyttalǵan. Bir mezette myń jas almatylyq týǵan qalasyna arnalǵan kórkem týyndylar jasaıdy.
Balalardyń shyǵarmashylyq jumystaryna Almatynyń tarıhy men qalanyń túrli beıneleri arqaý bolady. Qatysýshylar Uly Jibek joly men Altyn adam, Almatynyń kóne kósheleri, áıgili aport, taý shyńdary, sýburqaqtar men gúlzarlar, zamanaýı megapolıs jáne bolashaq Almaty taqyryptaryn týyndylarynda beıneleıdi.
Joba eki kezeńnen turady. 10–15 qyrkúıek aralyǵynda qatysýshylar úshin taqyryptyq sheberdiń sabaqtary ótkiziledi. Jumys «50/50» formatynda oryndalady: jas sýretshiler eskız ben fondy aldyn ala daıyndap, týyndylaryn 18 qyrkúıekte ótetin aýqymdy qalalyq plener barysynda aıaqtaıdy.
İs-sharanyń basty oqıǵalarynyń biri «Qazaqstandaǵy eń aýqymdy balalar pleneri» ulttyq rekordyn resmı tirkeý rásimi. Bir mezette 1000 balanyń qatysýy jobanyń Qazaqstan rekordtar kitabyna (KInES) enýine múmkindik beredi.
Qala turǵyndary men qonaqtary úshin «Týǵan kúnińmen, súıikti Almaty!» atty merekelik konserttik baǵdarlama da daıyndalǵan.
İs-sharanyń sharyqtaý shegi Almaty balalyq shaq ánuranynyń tusaýkeseri bolmaq. Jańa týyndyny qurama balalar hory men plener qatysýshylary birge oryndaıdy.
Plener sońynda balalardyń qatysýymen sımvoldyq kompozısıa jasalady: jas sýretshiler «Almaty: Bala.Art – Myń bala» sımvolıkasy beınelengen úlken matany jaıady. Ol balalar shyǵarmashylyǵyn, birlik pen týǵan qalaǵa degen súıispenshilikti beıneleıdi.
Ótetin kúni: 18 qyrkúıek 2026 jyl
Ýaqyty: 15:00-17:00
Ótetin orny: Dostyq dańǵyly 124, Oqýshylar saraıynyń alańy
