Memleket basshysy Qasym-Jomart Toqaev Qyrǵyz Respýblıkasy Jogorký Keneshiniń Tóraǵasy Marlen Mamatalıevti qabyldady, - dep habarlaıdy alnews prezıdenttiń Baspasóz qyzmetine silteme jasap.
Qasym-Jomart Toqaev Marlen Mamatalıevke iltıpat bildirip, onyń Qazaqstanǵa alǵashqy resmı sapary ekijaqty qarym-qatynasty nyǵaıtý turǵysynan aıryqsha mánge ıe ekenin atap ótti.
– Elimizge arnaıy kelgenińizge qýanyshtymyz. Saparyńyz óte mańyzdy. Bul eki el arasyndaǵy yntymaqtastyqqa tyń serpin beredi dep senemin. Elderimiz arasynda eshqandaı túıtkil nemese túsinispeýshilik joq. «Qazaq-qyrǵyz – bir týǵan» degen sóz bar. Bir keńistikte baýyrlas, tatý bolyp, aramyzdaǵy qarym-qatynasty nyǵaıta beremiz. Qyrǵyz Respýblıkasynyń ekonomıkasy joǵary qarqynmen damyp keledi. Biz bul oń úrdisti qoldaımyz. Qyrǵyz Respýblıkasy Birikken Ulttar Uıymy Qaýipsizdik Keńesiniń turaqty emes múshesi bolyp saılandy. Muny Qyrǵyzstan men Ortalyq Azıa elderi úshin tarıhı oqıǵa dep aıtýǵa bolady. Osyǵan oraı Prezıdent Sadyr Nýrgojoevıch Japarovqa quttyqtaý hat joldadym, – dedi Prezıdent.
Marlen Mamatalıev Qasym-Jomart Toqaevqa kezdesý úshin alǵys aıtyp, Prezıdent Sadyr Japarovtyń ystyq yqylasyn jetkizdi.
– Qyrǵyz tarapy Sizdiń basshylyǵyńyzben iske asyrylǵan aýqymdy konstıtýsıalyq ózgeristerdi qoldaıdy. Men muny senimdi túrde aıta alamyn. Bul ádiletti ári ozyq Qazaqstandy qurýǵa berik negiz qalaıdy. Sizge jáne baýyrlas Qazaqstan halqyna beıbitshilik, baq-bereke tileımin. Qolǵa alǵan reformalardy tabysty júzege asyrýlaryńyzǵa tilektespin, – dedi Jogorký Kenesh Tóraǵasy.
Kezdesý barysynda parlamentaralyq baılanystardy damytý jáne joǵary deńgeıde qol jetkizilgen ekijaqty ýaǵdalastyqtardy zańnamalyq turǵydan tıimdi qamtamasyz etý máseleleri talqylandy.
Eki elde júrgizilip jatqan júıeli áleýmettik-ekonomıkalyq reformalar jóninde mazmundy ári egjeı-tegjeıli áńgime órbidi.
Prezıdent pen Jogorký Kenesh Tóraǵasy Qazaqstan men Qyrǵyzstannyń strategıalyq seriktestik jáne odaqtastyq qarym-qatynasyn jan-jaqty damytýǵa beıil ekenin rastady.
