Seýlde Koreıa Respýblıkasynyń memleket jáne qoǵam qaıratkerlerine II dárejeli «Dostyq» ordeni saltanatty túrde tabystaldy, - dep habarlaıdy alnews.
Memleket basshysy búgingi mán-mańyzy erekshe rásimge jınalǵan qaýymǵa iltıpat bildirip, qazaq pen koreı ejelden dostas halyqtar ekenine nazar aýdardy.
– Eki eldiń arasy alshaq bolǵanymen, bizdi ózara qurmet pen ortaq múdde jaqyndastardy. Koreıa ekonomıkasy aınalasyndaǵy básekelestik pen syn-qaterlerge qaramastan oıdaǵydaı damýda. Bul – halyqtyń eńbekqorlyǵy men iri kásipkerlerdiń arqasy. Qazaq halqy men bılik ókilderi dostas Koreıa eline shynaıy syılastyqpen qaraıdy. Koreıa Respýblıkasy – Qazaqstannyń strategıalyq seriktesi. Biz Koreıany halyqaralyq abyroı-bedeli zor memleket retinde bilemiz. Búginde memleketterimizdiń san qyrly yntymaqtastyǵy jyl sanap nyǵaıyp keledi. Osydan bes jyl buryn Keńeıtilgen strategıalyq seriktestik týraly málimdeme qabyldaǵan edik, – dedi Qasym-Jomart Toqaev.
Prezıdent eki memleket arasynda tereń saıası dıalog ornap, san qyrly yntymaqtastyq nyǵaıǵanyn atap ótti.
– Saýda-ekonomıkalyq qarym-qatynas qarqyndy damyp kele jatyr. Biz mashına jasaý, energetıka, metalýrgıa, ozyq tehnologıa jáne basqa da salada birqatar iri jobany júzege asyryp jatyrmyz. Álemge tanymal koreı kompanıalary elimizde tabysty jumys isteýde. Mádenı-gýmanıtarlyq baılanysymyz da kúsheıdi, – dedi Memleket basshysy.
