Almatynyń Almaly aýdanyndaǵy Tastaq shaǵynaýdanynda ornalasqan «Asyl» saýda ortalyǵynda Qala kúni aıasynda qalalyq kitaphanalardyń jańa kitap berý pýnkti ashyldy, - dep habarlaıdy alnews.
Joba Memleket basshysy Qasym-Jomart Toqaevtyń «Oqıtyn ult» jobasy aıasynda, qala ákimi Darhan Satybaldynyń tapsyrmasymen júzege asyrylyp jatyr. Jobanyń maqsaty – kitapty qala turǵyndaryna barynsha qoljetimdi etý, oqýǵa degen qyzyǵýshylyqty arttyrý jáne kitap oqý mádenıetin damytý.
Kitap berý pýnktiniń ashylý rásimine Almaly aýdany ákiminiń orynbasary Oljas Qurmanbekuly, Qazaqstannyń eńbek sińirgen qaıratkeri Sáýle Dosjan, Qazaqstan Jazýshylar odaǵynyń múshesi, aqyn ári jazýshy Beıbit Sarybaı, jýrnalıs ári jazýshy Baıan Bolathanova, mádenıet salasynyń ókilderi men qala turǵyndary qatysty.
İs-shara barysynda shyǵarmashylyq zıaly qaýym ókilderi kitaptyń adam ómiri men qoǵamdaǵy róline toqtalyp, ádebıetti kópshilikke jaqyndatýdyń jáne kitap oqýǵa degen qyzyǵýshylyqty arttyrýdyń mańyzyn atap ótti.
Qazaqstannyń eńbek sińirgen qaıratkeri Sáýle Dosjan kitap berý pýnktiniń saýda ortalyǵynda ashylýy turǵyndar úshin mańyzdy ekenin aıtty.
«Búgin Almaly aýdanynda turǵyndar úshin mańyzdy ári qoljetimdi mádenı keńistik ashylyp otyr. Kópshilik jıi keletin saýda ortalyǵyna kitaphanany jaqyndatý – kitap oqýdy kúndelikti ómirdiń bir bóligine aınaldyrýǵa baǵyttalǵan jaqsy bastama. Osyndaı jobalardyń kóbeıýi turǵyndardyń kitapqa degen qyzyǵýshylyǵyn arttyryp, kitap oqý mádenıetiniń odan ári damýyna yqpal etedi dep senemin», – dedi Sáýle Dosjan.
Buǵan deıin «Adem» saýda ortalyǵynda alǵashqy kitap berý pýnkti ashylǵan bolatyn. Turǵyndar men kásipkerler tarapynan qoldaý taýyp, oqyrmandardyń qyzyǵýshylyǵyn arttyrǵan bastama endi qalanyń basqa aýdandarynda da jalǵasyn tabady. Aldaǵy ýaqytta osyndaı kitap berý pýnktterin ózge saýda ortalyqtarynda ashý josparlanǵan.
Jańa kitap berý pýnktiniń ashylýyn jergilikti kásipkerler de jyly qabyldady.
«Jumys ornymyzda kitap berý pýnktiniń ashylǵanyna qýanyshtymyn. Munda motıvasıalyq jáne kásibı kitaptardy alyp oqýǵa, sondaı-aq kásibimizdi damytýǵa kómektesetin ádebıettermen tanysýǵa múmkindik bar. Menińshe, bul biz úshin úlken múmkindik. Osyndaı ıgi bastama úshin Almaty ákimdigi men qalalyq kitaphanalarǵa myń alǵys!» – dedi kásipker Azamat İńkárov.
Qazir kitap berý pýnktiniń qorynda 2 000-nan astam kitap bar. Oqyrmandar kórkem ádebıetten bastap balalarǵa arnalǵan jáne tanymdyq basylymdarǵa deıin talǵamyna saı kitap tańdaı alady.
Jańa kitap berý pýnkti sársenbi men dúısenbi aralyǵynda saǵat 10:00-den 19:00-ge deıin jumys isteıdi. Seısenbi – demalys kúni.
