Sporttyq gımnastıkadan úsh dúrkin Olımpıada chempıony Lı Nın Almatydaǵy №9 olımpıada rezerviniń mamandandyrylǵan balalar-jasóspirimder mektebine bardy. Bul týraly Almaty qalasy Sport basqarmasynyń ókilderi habarlady.
Kezdesý mekteptiń jattyǵý zalynda ótti. Jas sportshylar arnaıy kórsetilim uıymdastyryp, sporttyq gımnastıkanyń túrli elementterin oryndady. Lı Nın tárbıelenýshilerdiń daıyndyǵymen tanysyp, olardyń jattyǵý barysyn tamashalady.
Olımpıada chempıony jas sportshylarǵa qol jetkizgen jetistikterimen shektelmeı, jattyǵýdy jalǵastyryp, alǵa qoıǵan sporttyq maqsattaryna tabandylyqpen umtylýǵa tilektestik bildirdi. Kórsetilimnen keıin balalar áıgili gımnasttan qoltańba aldy.
Sapar barysynda Lı Nın buqaralyq aqparat quraldarynyń ókilderimen de tildesip, sport pen óziniń kásibı mansabyna qatysty suraqtarǵa jaýap berdi.
Lı Nın – Qytaıdyń eń tanymal gımnastarynyń biri. Ol 1984 jyly Los-Andjeleste ótken Olımpıada oıyndarynda birden alty medal jeńip aldy. Onyń úsheýi – altyn. Osy nátıjesimen Lı Nın sol Olımpıadadaǵy eń tabysty gımnastardyń birine aınaldy.
Almatylyq jas sportshylar úshin bul kezdesý Olımpıada chempıonymen júzdesip, álemdik gımnastıka tarıhynda ózindik iz qaldyrǵan sportshymen tikeleı tildesýge múmkindik berdi.
