Brússelde Eýropalyq Odaqqa múshe memleketter iskerlik orta ókilderiniń qatysýymen «Qazaqstan – EO» dóńgelek ústeli uıymdastyryldy, - dep habarlaıdy alnews.
Qasym-Jomart Toqaev jıynǵa qatysýshylar aldynda sóz sóılep, Qazaqstan men EO arasyndaǵy qarym-qatynas shynaıy strategıalyq sıpatqa ıe bolǵanyn atap ótti.
– Búginde Eýropalyq Odaq elimizdiń eń iri saýda jáne ınvestısıalyq seriktesi sanalady, onyń úlesine Qazaqstanǵa shetelden tikeleı tartylǵan ınvestısıanyń jartysyna jýyǵy tıesili. Tek ótken jyldyń ózinde ekijaqty taýar aınalymy 45 mıllıard dollardan asty. Bul jetistik halyqaralyq deńgeıde moıyndaldy. BUU Saýda jáne damý uıymynyń (IýNKTAD) dúnıejúzilik ınvestısıalar týraly sońǵy esebine sáıkes, Qazaqstan shet elden tikeleı ınvestısıa tartý boıynsha Ortalyq Azıada birinshi orynǵa ıe, sondaı-aq postkeńestik keńistik pen teńizge shyǵatyn joly joq damýshy elder arasynda kóshbasshylyqty saqtap keledi. Qazaqstanda 4 myńǵa jýyq eýropalyq kompanıa tabysty jumys isteıdi. Olardyń kóbi, ásirese, Airbus, Polpharma Group, Air Liquide Group, Škoda Group jáne Alstom sekildi kompanıalar ondaǵan jyldardan beri senimdi serikteske aınaldy. Sonymen birge biz eýropalyq ınvestorlardyń jańa býynyn qýana qarsy alamyz. Olardyń qatarynda Roca Group, Inditex, Maersk, Dewulf jáne Damen Shipyards Group sıaqty tanymal kompanıalar bar, – dedi Prezıdent.
