Prezıdent Qasym-Jomart Toqaevtyń tóraǵalyǵymen asa mańyzdy mıneraldar, sonyń ishinde sırek kezdesetin metaldar salasyn damytý máseleleri jóninde Qaýipsizdik Keńesiniń otyrysy ótti, - dep habarlaıdy Aqorda.
Memleket basshysy Qazaqstan resýrs jáne óndiris áleýeti jaǵynan Ortalyq Azıada kósh bastap turǵanyna nazar aýdaryp, muny memleket múddesine paıdalaný qajettigin atap ótti.
– Qazba baılyǵy mol elder úshin álemdegi qazirgi ahýal tıimdi ári biregeı múmkindikterge jol ashyp otyr, – dedi Memleket basshysy.
Sonymen qatar Prezıdent dúnıe júzinde asa mańyzdy materıaldarǵa qol jetkizýde memleketter arasyndaǵy básekelestik kúsheıe túskenin aıtty. Bul baǵyt joǵary tehnologıalyq salalardy damytý turǵysynan strategıalyq mańyzǵa ıe. Osy oraıda Qazaqstan qolda bar resýrstar men ónerkásip áleýetin tıimdi paıdalanyp, óz múmkindikteri men óndiris tizbegin dáıekti túrde damytqany jón.
Jıyn barysynda Úkimet músheleri salanyń qazirgi jaı-kúıi, resýrs qoryn ıgerý perspektıvasy, qaıta óńdeý baǵytyn damytý jáne kedergiler týraly esep berdi.
Otyrys qorytyndysy boıynsha Úkimet pen tıisti memlekettik organdarǵa salany damytýǵa qatysty júıeli kózqaras qalyptastyrý, retteý tetikterin jetildirý, geologıalyq barlaý men óńdeý isin damytý, tehnogendi mıneraldyq túzilimderdi ekonomıkalyq aınalymǵa qosý, zerthanalar bazasy men kadrlar quramyn nyǵaıtý, sondaı-aq ákimshilik kedergilerdi joıý jóninde naqty tapsyrmalar berildi.
