Kóktóbe saıabaǵynda aýmaǵy 4 gektar bolatyn jańa gúldi betkeıdiń kóriktendirý jumystary aıaqtaldy, - dep habarlaıdy alnews.
Almaty qalasynyń Týrızm basqarmasy ókilderiniń málimetinshe, aýqymdy kógaldandyrý jáne kórkeıtý nátıjesinde munda serýendeýge arnalǵan baǵyttar, sholý alańdary men Almatynyń kórkem kórinisi ashylatyn jańa qoǵamdyq keńistik paıda boldy.
Jobanyń basty ereksheligi – gúldeý kezeńinde taý bókterine erekshe kórik beretin lavanda terasalary. Munda erte kóktemnen kúz sońyna deıin sánin joǵaltpaıtyn 20-dan astam kópjyldyq ósimdik, sándik buta men astyq tuqymdas ósimdikter egilgen. Landshaftyq kompozısıany gortenzıa, tobylǵy, shatyrash, kókjalbyz (kotovnık), qyzylkúreń jáne sándik astyq tuqymdas ósimdikter tolyqtyrady.
Jobany iske asyrý barysynda tabıǵı jer bederin saqtaýǵa erekshe kóńil bólindi. Betkeıler erozıadan qorǵaý úshin gabıon qurylymdarymen bekitilip, kelýshilerdiń jaıly serýendeýi úshin tabıǵı landshaftpen úılesimdi kiriktirilgen júrginshi joldary, baspaldaqtar jáne sholý alańdary salyndy.
Jańa qoǵamdyq keńistik kelýshiler úshin ashyq. Gúl kompozısıalary saıabaqtyń ár tusynan anyq kórinedi, al serýen baǵyttarynan Almaty qalasy men İle Alataýynyń ásem kórinisi ashylady. Jańa gúldi betkeı tabıǵat pen zamanaýı landshaftyq dızaın úılesim tapqan qalanyń kórikti oryndarynyń birine aınaldy.
