Almatyda Halyqaralyq jastar kúnine oraı uıymdastyrylǵan ALMA LOVE 2026 qalalyq jastar festıvali aıasynda Jas Vibe aksıasy jalǵasýda, - dep habarlaıdy alnews.
Alǵashqy bes kúnniń ishinde jobaǵa 5 myńnan astam qala turǵyny qatysty. Bul týraly Almaty qalasy Jastar saıasaty basqarmasynyń ókilderi aıtty.
Aksıanyń basty ereksheligi – qala aýdandaryn aralap júrgen brendtelgen Jas Vibe avtobýsy. «Jas Almaty» uıymynyń belsendileri men festıváldiń maskottarymen birge komanda túrli baıqaýlar men ınteraktıvter uıymdastyryp, turǵyndardy festıvál baǵdarlamasymen tanystyryp, ALMA LOVE festıvaliniń qorytyndy konsertine shaqyrýda.
Baǵyt qalanyń ortalyq kósheleri men tanymal qoǵamdyq keńistikterin ǵana emes, shalǵaı shaǵynaýdandar men qalanyń tómengi bóligin de qamtıtyndaı etip jasalǵan. Avtobýs aýlalarǵa, skverlerge jáne turǵyndardyń demalys oryndaryna toqtaıdy.
«Ádette mundaı is-sharalar qalanyń ortalyǵynda ótetin. Sondyqtan bizdiń aýdanǵa osyndaı jarqyn avtobýstyń kelgeni erekshe áser qaldyrdy. Uıymdastyrýshylardyń shalǵaı aýdandarǵa arnaıy kelip, turǵyndarmen kezdesip, baıqaýlar ótkizip jatqany qýantady. Bul merekeniń shynymen búkil qala úshin uıymdastyrylǵanyn kórsetedi», – dedi aksıaǵa qatysqan almatylyq jas turǵyn.
Aıaldamalarda ALMA LOVE festıvaliniń qorytyndy konserti ótetin fan-aımaqqa shaqyrý bıletteri oınatylady. Olardy baıqaýlar men ınteraktıvterge belsendi qatysqan turǵyndar jeńip ala alady.
Jas Vibe aksıasy 12 tamyzǵa deıin jalǵasady. Sol kúni ALMA LOVE 2026 festıvali merekelik qorytyndy konsertpen aıaqtalady.
