Memleket basshysy Qasym-Jomart Toqaev Respýblıkalyq tamyz konferensıasynda sóılegen mańyzdy sózinde balalardy qorǵaý, olardyń qaýipsizdigi men ál-aýqaty máselelerine aıryqsha toqtaldy. Tamyz konferensıasyna qatysa otyryp, memleketimizdiń balalardyń quqyǵyn qorǵaý, olardyń damýyna júıeli jaǵdaı jasaý baǵytyndaǵy syndarly saıasatynyń mánin taǵy bir márte tereń uǵyndyq.
Prezıdentimiz atap ótkendeı, jyl basynan beri elimizde «Qazaqstan balalary» tujyrymdamasy júzege asyrylyp keledi. Barlyq óńirlerde balalardyń quqyqtaryn qorǵaý basqarmalary men psıhologıalyq qoldaý ortalyqtary quryldy. Bul, árıne, óskeleń urpaqtyń quqyqtary men múddelerin qorǵaýǵa baǵyttalǵan mańyzdy júıeli qadamdar.
Balalardyń dúnıetanymy men psıhologıalyq jaǵdaıyna áleýmettik jelilerdiń, sıfrlyq platformalardyń, jasandy ıntellekttiń jáne aqparattyq ortanyń tıgizetin áserine, bir sózben aıtqanda olardyń qazir betpe-bet kelip otyrǵan jańa syn-qaterleri de nazardan tys qalmady.
Memleket basshysy bul baǵyttaǵy eń mańyzdy mindetterdiń biri retinde balalardyń psıhologıalyq jaǵdaıyna tónetin qaýipterdiń aldyn alý kerektigin basa belgiledi. Aldyn-ala áreket otyryp, qaýipti erterek baıqaý, balany tyńdaı bilý, naqty kómek kórsetý jáne naqty nátıjege deıin súıemeldeýdi qamtamasyz etý asa mańyzdy.
Óskeleń urpaqtyń quqyqtyq saýattylyǵyna da basa nazar aýdaryldy. Osy oqý jylynan bastap mektepterde «Quqyq negizderi» páni oqytyla bastaıdy, al bilim berý baǵdarlamalaryna «Konstıtýsıa negizderi» jáne «Zań men Tártip» kýrstary engiziledi. Taǵy bir ózekti másele – balalardyń sıfrlyq keńistiktegi qaýipsizdigi. Kámeletke tolmaǵandardy zıandy kontentten qorǵaý sharalary, sondaı-aq 16 jasqa tolmaǵan balalardyń áleýmettik jelilerde tirkelýin shekteý jáne balalarǵa arnalǵan SIM-kartalardy aýqymdy etý máseleleri atap ótildi.
Alaıda barlyq baǵdarlamalar, tetikter men sheshimder sanǵa emes, tikeleı balalarǵa baǵyttalýy tıis. Sebebi, árbir sannyń artynda bir-bir taǵdyr, ár sıgnaldyń artynda nazar aýdarýdy qajet etetin jaǵdaı turýy múmkin. Al bizdiń mindetimiz – sonyń árqaısysyna jaýapkershilikpen qarap, ýaqytynda tanyp, ýaqytynda kómek berý.
Bir sózben aıtqanda, júıeli sheshimder árbir balaǵa dál osyndaı jolmen jetýi tıis.
Aıtpaeva Janat Jeńisbekqyzy,
Almaty qalasy Balalardyń quqyqtaryn qorǵaý
basqarmasynyń basshysy
