Izraıl armıasy (SAHAL) Lıvan shekarasyna qurlyq arqyly basyp kirdi. Tel-Avıv resmı málimdemesinde bul áreketin "shekti operasıa" dep atady jáne shekara mańyndaǵy "Hezbolla" uıymyna tıesili áskerı nysandardy joıýdy kózdegenderin aıtty.
Buǵan deıin Lıvanda qarýly qaqtyǵystyń bastalýy aımaqtaǵy aýqymdy soǵysqa ıtermeleýi múmkin degen qaýiptenýler bolǵan. Soǵan qaramastan Izraıl óz tarıhynda ekinshi márte Lıvan jerine áskerı kúshpen kirdi.
Búgin tańda Lıvannyń ońtústigindegi shekara mańynda Izraıl men "Hezbolla" arasynda surapyl shaıqastardyń bolǵany týraly habarlar tarady.
SAHAL-dyń qurlyqtaǵy qımylyna áýe kúshteri men artılerıa da qoldaý kórsetip, shekaraǵa jaqyn mańdaǵy "Hezbollaǵa" tıesili dep tanylǵan nysandardy tymbaı atqylady.
Izraıl armıasynyń Lıvanǵa qurlyq arqyly áskerı operasıa bastaıtyny týraly resmı málimet 30 qyrkúıek kúni keshte taraı bastady. Bir kún buryn amerıkalyq basylymdar ózderiniń senimdi aqparat kózderine siltep, Izraıldiń qurlyqtaǵy shabýyly bastalýǵa jaqyn turǵanyn habarlaǵan.
Al operasıa aldynda Pentagonnyń qazirgi jetekshisi Ostın óziniń ızraıldiń áriptesimen sóılesý ótkizgen. Qurama Shtattar aımaqtaǵy beıbitshilik kelissózderine jetekshilik etip kelgenine qaramastan Lıvandaǵy qarýly qaqtyǵysqa jol bergendeı kórindi. Degenmen, Izraıl shabýyl tek "Hezbollanyń" shekaraǵa jaqyn áskerı ınfraqurylymdaryna baǵyttalǵanyn aıtyp sendirgen.
Búgin tańda Izraıl resmıleri Lıvandaǵy operasıalardyń dúısenbi kúni túnde bastalǵanyn, bul áskerı qımylǵa birneshe aı boıy Hamasqa qarsy soǵysqan Gazadan elıtalyq 98-shi dıvızıanyń qatysqanyn málimdedi. Bul dıvızıa eki apta buryn ǵana soltústik shekaraǵa ornalastyrylǵan edi.
Ótken aptada Izraıl Beırýtte "Hezbolla" basshysy Hasan Nasrallany óltirip, Iran qoldaǵan ári Taıaý Shyǵystaǵy eń qýatty kúshtiń biri "Hezbollaǵa" aýyr soqqy bergen bolatyn.
Tel-Avıv "Shekti áskerı operasıa" ataǵan bul shabýyldyń qashanǵa deıin jalǵasatyny belgisiz. Aıta keteıik, "Hezbolaǵa" qarsy bul soqqylar bir jaǵynan Irannyń aımaqtaǵy yqpal-áserine de aýyr soqqy deýge bolady. Osyǵan deıingi úrkitken-qorqytqan málimdemelerine qaramastan Tegeran Izraılge qarsy qazirge eshqandaı naqty áreketke baryp otyrǵan joq.
The ALNEWS
