Almatyda IV Almaty Circus Festival halyqaralyq sırk óneri festıvali máresine jetti, - dep habarlaıdy alnews.
Bul Qazaq memlekettik sırkiniń manejinde álemniń ár elinen kelgen úzdik sırk artıserin toǵystyrǵan jyldyń eń aıtýly mádenı mádenı oqıǵalarynyń biri boldy. Birneshe kún boıy kórermender zamanaýı sırk óneriniń bıik deńgeıin aıshyqtaǵan biregeı qoıylymdardy, kúrdeli trúkter men tusaýkeser nómirlerdi tamashalady.
Ótken jyldar ishinde Almaty Circus Festival manej sheberleri, jas daryndar, jetekshi sırk uıymdarynyń basshylary, prodúserler men bedeldi halyqaralyq festıválderdiń uıymdastyrýshylary toǵysatyn bedeldi halyqaralyq alańǵa aınaldy. Búginde festıvál álemdik sırk óneriniń mańyzdy forýmdarynyń qatarynan oıyp turyp oryn alyp, artıserge kásibı turǵydan damýǵa, halyqaralyq yntymaqtastyqty nyǵaıtýǵa jańa múmkindikter ashyp keledi.
Baıqaý baǵdarlamasyna álemdik sırk óneriniń tanymal qaıratkerleri, iri sırk uıymdary, halyqaralyq festıválder men prodúserlik kompanıalardyń jetekshileri engen halyqaralyq qazylar alqasy tórelik etti.
Festıváldiń eń joǵary marapaty – Bas júlde Qytaıdyń Hebei Wuqiao Acrobatic Arts School óner mektebiniń artıseri Chjan Hao men Lı Tán Men oryndaǵan «Double Wire Act» («Erkin sym – kerilgen arqan») nómirine buıyrdy. Qos ónerpazdyń joǵary tehnıkalyq sheberligi, tepe-teńdikti minsiz saqtaı bilýi, asa kúrdeli trúkterdi oryndaýdaǵy kásibıligi men kórkemdik sheshimi qazylar alqasynyń joǵary baǵasyna ıe bolyp, baıqaýdyń sharyqtaý shegine aınaldy.
Altyn júldege Fransıadan kelgen Týrbelın Mateo Antýan men Savarı Elıanyń juptyq dıabolo ónerin pash etken «Venus» nómiri, Mońǵolıanyń Ýrangoo Chınbatar jetekshilik etetin «Selenge» trýppasy, sondaı-aq Belarýs memlekettik sırkiniń trapesıadaǵy áýe gımnastary Egor men Anastasıa Kovalenkonyń «Legend» nómiri laıyq dep tanyldy.
Kúmis júlde Vengrıanyń Kriko dýetine (Zoı Krıvanek pen Bense Kollar) áýe beldikterindegi sheber óneri úshin, Reseılik artıs Olga Rojkovskaıanyń «Áýe arqany» nómirine jáne Shveısarıanyń Janine & Fabien dýeti oryndaǵan áýe adajıosyna tabystaldy.
Qola júldeni Ózbekstannyń Sky Angels «Infinity Aliyeva» ujymy, Ýkraına men Armenıa atynan óner kórsetken jongler Davıd Emıshán, sondaı-aq Nadejda Efımenko jetekshilik etetin Shymkent sırkiniń «Aspan arýlary» áýe gımnastary ıelenip, Qazaqstannyń abyroıyn asqaqtatty.
Festıváldiń jabylý saltanatynda halyqaralyq qazylar alqasynyń arnaıy syılyqtary dástúrli túrde tabystaldy. Bul marapattar kóptegen ónerpaz úshin álemniń jetekshi sırk arenalaryna, aıtýly halyqaralyq festıválderge jol ashyp, jańa shyǵarmashylyq jobalarǵa qatysýǵa múmkindik beredi.
IV halyqaralyq Almaty Circus Festival Almatynyń zamanaýı sırk óneriniń halyqaralyq ortalyqtarynyń biri retindegi joǵary mártebesin taǵy bir márte aıqyndady. Qatysýshylar úshin bul festıvál kásibı sheberlik básekesi ǵana emes, álemdik deńgeıdegi festıválderge shaqyrtý alyp, halyqaralyq kelisimsharttar jasaýǵa jáne sırk ındýstrıasynyń jetekshi ókilderine ónerin tanytýǵa múmkindik bergen mańyzdy shyǵarmashylyq alań boldy.
Festıvál taǵy bir márte sırk óneriniń tili eshqandaı aýdarmany qajet etpeıtin ámbebap óner ekenin dáleldedi. Batyldyq pen talant, adam múmkindiginiń sheksizdigi men isine degen adaldyq álemniń ár qıyrynan kelgen artıserdi bir manejde toǵystyryp, kórermenge umytylmas áser men álemdik sırk óneriniń shynaıy merekesin syılady. Qazirdiń ózinde IV Almaty Circus Festival Qazaqstannyń mádenı ómirindegi eń jarqyn oqıǵalardyń birine aınalyp, otandyq sırk óneriniń halyqaralyq bedelin arttyrý jolyndaǵy mańyzdy beles bolǵanyn nyq senimmen aıtýǵa bolady.
Eske sala keteıik, IV halyqaralyq Almaty Circus Festival festıvaliniń merekelik gala-konserti 23 tamyzǵa deıin jalǵasady. Almaty turǵyndary men qala qonaqtary álemniń jetekshi sırk artıseri oryndaýyndaǵy biregeı qoıylymdardy, tańǵajaıyp trúkterdi jáne festıváldiń úzdik nómirlerin tamashalaı alady.
