Almaty qalasynyń ákimi Darhan Satybaldynyń tóraǵalyǵymen sport salasyn damytý jaıy boıynsha keńes ótti, - dep habarlaıdy alnews.
Jıynda sport rezervin daıarlaý, sportshylar men jattyqtyrýshylardy qoldaý, qala turǵyndary úshin sport nysandarynyń qoljetimdiligin arttyrý jáne iri halyqaralyq jarystardy ótkizý máseleleri qaraldy.
Qalalyq Sport basqarmasynyń basshysy Darhan Nurhanuly atqarylǵan jumystardyń nátıjesi týraly baıandap, aldaǵy kezeńge arnalǵan josparlardy tanystyrdy. Búginde Qazaqstan ulttyq quramasynyń sapynda Almatynyń 2 544 sportshysy bar. Iaǵnı ulttyq quramanyń árbir tórtinshi múshesi – almatylyq sportshy.
Almatylyq sportshylardyń enshisinde 2 230 medal bar. Onyń ishinde álem chempıonattarynyń 60 medali, Azıa chempıonattarynyń 105 medali jáne Qazaqstan chempıonattarynyń 2 065 medali bar. Bıyl almatylyq sportshylar sporttyq gımnastıkadan Álem kýbogy kezeńderinde jáne stend atýdan jasóspirimder arasyndaǵy álem chempıonatynda Qazaqstan tarıhyndaǵy alǵashqy jeńisterge qol jetkizdi. Sondaı-aq basqa da sport túrlerinde tarıhı nátıjeler kórsetti.
Aı saıynǵy aqshalaı qamsyzdandyrý alýshylardyń sany tórt esege jýyq artty. Sportshylar sany 244-ten 925-ke, al jattyqtyrýshylar sany 28-den 341-ge deıin ósti. Keńeıtilgen qoldaý júıesi jasóspirimder, jastar, paralımpıadalyq jáne sýrdlımpıadalyq sport ókilderin de qamtıdy. Sonymen qatar 200-den astam jetekshi sportshy tereńdetilgen ǵylymı-medısınalyq tekserýden ótti.
Qala turǵyndaryn dene belsendiligine tartý maqsatynda ALMATY MOVE, «Sport – Dostyq alańy», Stýdenttik sport lıgasy, Balalar fýtbol lıgasy jobalary jáne tegin jattyǵýlar uıymdastyrylýda. Qala kóleminde ótken iri sporttyq is-sharalarǵa 40 myńnan astam adam qatysty. Jyl sońyna deıin Almatynyń barlyq aýdanynda 2 myńnan astam sporttyq is-shara ótkizý josparlanǵan.
Sondaı-aq qala Almaty Marathon, ATP 250 Almaty Open, jıý-jıtsýdan Azıa chempıonaty, WTT Youth Contender Almaty, FIBA Azıa kýbogynyń irikteý oıyndary jáne FIDE uıymdastyratyn ýnıversıtetter arasyndaǵy shahmattan álem chempıonatynyń fınalyn qosa alǵanda, 35 halyqaralyq jarysty qabyldaýǵa daıyndalýda.
Keńes qorytyndysy boıynsha Darhan Satybaldy sport ınfraqurylymyn jańǵyrtý jumystaryn jalǵastyrýdy, onyń turǵyndar úshin qoljetimdiligin arttyrýdy, balalar men jasóspirimder sportyna basymdyq berýdi jáne sportshylardy halyqaralyq jarystarǵa sapaly daıarlaýdy tapsyrdy. Sonymen qatar qoldanystaǵy sport ınfraqurylymynyń tıimdi paıdalanylýyn qamtamasyz etý jáne qalanyń barlyq aýdanynda tegin sporttyq jattyǵýlardyń sanyn kóbeıtý jóninde naqty mindetter júktedi.
