Almaty ákimi Darhan Satybaldy men Almaty oblysynyń ákimi Marat Sultanǵazıev Almaty aglomerasıasy jergilikti keńesiniń kezekti otyrysyn ótkizdi, - dep habarlaıdy alnews.
Jıynda qala mańyndaǵy eldi mekenderdi gazdandyrý, kólik ınfraqurylymyn damytý jáne qala shekarasyna jaqyn aýmaqtarda mektepter salý jaıy qaraldy.
Keńestegi negizgi máseleniń biri Qarasaı, İle jáne Talǵar aýdandary turǵyndaryn tabıǵı gazben qamtý boldy. Injenerlik ınfraqurylymdy damytýmen qatar, magıstraldyq jelilerdi salýmen shektelmeı, turǵyn úılerdi gazben jabdyqtaý júıesine qosýdy jedeldetýdiń mańyzdylyǵy atap ótildi. Osy maqsatta Almaty oblysynyń ákimdigi halyq úshin qolaıly qarjylandyrý tetikterin ázirlep, eldi meken ishindegi gaz jelileriniń qurylysyn jedeldetip, qajetti rásimderdi jeńildetedi.
Sondaı-aq, Túrksib aýdanyndaǵy bes kómir bazasyn kóshirý máselesi qaraldy. Qalada satylatyn kómirdiń 85 paıyzyn Almaty aglomerasynyń turǵyndary tutynatyny, bul óz kezeginde qalanyń ınfraqurylymyna qosymsha júkteme túsiretini aıtyldy.
Almaty qalasynyń shekarasynan Úlken Almaty aınalma avtomobıl jolyna (ÚAAAJ) deıingi radıaldy joldardy uzartý máselesine de erekshe nazar aýdaryldy. Joba qala búdjeti esebinen júzege asyrylady. Qazirgi ýaqytta jer telimderin satyp alý jáne jobalyq qujattamany jańartý jumystary aıaqtalýǵa jaqyn.
Almaty ákimi Darhan Satybaldy Abaı, Rysqulov dańǵyldary men Saın kóshesin uzartý arqyly ÚAAAJ-ǵa qosylatyn joldardy qysqa merzimde qamtamasyz etýdi tapsyrdy.
«Bul basym mindetterdiń biri. Qoldanystaǵy joldarǵa túsetin júktemeni azaıtyp, tranzıttik kóliktiń qala aýmaǵyn aınalyp ótýin qamtamasyz etýimiz jáne avtokóliktiń qorshaǵan ortaǵa tıgizetin teris áserin tómendetýimiz qajet. Qajetti qarjy bólingen, jumys kólemi aıqyndalǵan. Salalyq basqarmalar jumystyń sapaly ári ýaqytyly oryndalýyn qamtamasyz etýge tıis», – dedi Darhan Satybaldy.
Óz kezeginde Almaty oblysynyń ákimi Marat Sultanǵazıev aglomerasıa halqynyń sany turaqty túrde ósip kele jatqanyn atap ótti. Ásirese, Alataý qalasynda, sondaı-aq Qarasaı, İle jáne Talǵar aýdandaryndaǵy jańa turǵyn alaptary qarqyndy damyp keledi.
«Osyǵan baılanysty mektepter salýǵa arnalǵan jer ýchaskelerin aldyn ala anyqtaý, ınjenerlik ınfraqurylymdy tartý jáne qurylys jumystaryn jedel bastaý erekshe mańyzdy. Sonymen qatar qala mańyndaǵy jolaýshylar tasymaly Almaty aglomerasıasy turǵyndary úshin ózekti máseleniń biri bolyp qala beredi. Kún saıyn oblystyń ondaǵan myń turǵyny Almatyǵa qatynaıdy. Sondyqtan qoǵamdyq kóliktiń qoljetimdiligin qamtamasyz etý, marshrýt jelisin ońtaılandyrý jáne jolaýshylar tasymalynyń sapasyn arttyrý – negizgi mindetterdiń biri. Bizdiń maqsatymyz – ákimshilik shekaralarǵa qaramastan, aglomerasıa turǵyndary úshin biryńǵaı, qolaıly ári tıimdi kólik júıesin qalyptastyrý», – dedi Marat Sultanǵazıev.
