Almatyda «Almaty – bilim men ınovasıa ortalyǵy: jańa halyqtyq konstıtýsıa qundylyqtary negizinde adamı kapıtaldy damytý» taqyrybynda pedagog qyzmetkerlerdiń dástúrli tamyz konferensıasy ótti, - dep habarlaıdy alnews.
Respýblıka saraıynda ótken is-sharaǵa Almaty ákimi Darhan Satybaldy qatysty.
Konferensıada 2026–2027 oqý jylyna arnalǵan bilim berý júıesiniń negizgi mindetteri aıqyndaldy. Ásirese, bilim sapasyn arttyrýǵa, oqýshylardyń sıfrlyq quzyretin damytýǵa, jasandy ıntellektini engizýge, sondaı-aq «Adal azamat» jáne «Zań men tártip» qundylyqtaryn nyǵaıtýǵa basa nazar aýdaryldy.
«Bizdiń aldymyzda jasalǵan múmkindikterdi naqty ári ólshenetin nátıjege aınaldyryp, balalarymyzdyń bilim sapasynyń turaqty ósýin qamtamasyz etý mindeti tur. Bul rette muǵalimniń kásibı sheberligi men ár mektep jumysynyń tıimdiligi sheshýshi mánge ıe. Memleket basshysy Qasym-Jomart Toqaevtyń tapsyrmasymen Almatyda 2026–2029 jyldarǵa arnalǵan orta bilim berý júıesine jasandy ıntellektini engizýdiń óńirlik jospary júzege asyrylyp jatyr. «Almaty Digital Mektebi» biryńǵaı qalalyq sıfrlyq platformasy kezeń-kezeńimen engizilýde. Qaladaǵy barlyq mektep joǵary jyldamdyqty ınternetpen qamtamasyz etilgen, bilim berý úderisine qatysatyn 200 myńnan astam adam jasandy ıntellekt quraldaryn paıdalanady. Jańa oqý jylynda pedagogterdiń AI-quzyretterin arttyrý, 60 pándik kabınetti jabdyqtaý jáne beıindi zerthanalardy damytý jumystary jalǵasady», – dedi Darhan Satybaldy.
Mamanmen qamtamasyz etý máselesine erekshe nazar aýdaryldy. 2027–2030 jyldary asa suranysqa ıe pedagogıkalyq baǵyttar boıynsha Almaty ákimi granttaryn bólý josparlanyp otyr. Oqý ornyn aıaqtaǵan túlekter keıin qala mektepterine jumysqa ornalastyrylady.
Bilim berý ınfraqurylymyn damytý jumystary jalǵasýda. Ótken jyly 40 myńǵa jýyq orynǵa arnalǵan 37 bilim berý nysany paıdalanýǵa berildi. Jańa oqý jylynyń basyna deıin 8 jańa mektep pen 3 jańa korpýs ashylyp, 11 950 oqýshy orny qurylady.
Almaty bilim sapasy boıynsha joǵary kórsetkishterin saqtap keledi. Qala oqýshylary 24 jyl qatarynan elimizdiń úzdik olımpıadalyq komandasy atanyp otyr. 2026 jyly segiz oqýshy halyqaralyq pándik olımpıadalardyń jeńimpazy jáne júldegeri atandy. Pedagogter de joǵary nátıje kórsetip keledi: Almatynyń jeti muǵalimi «Úzdik pedagog – 2025» baıqaýynyń jeńimpazy atansa, №95 mektep-lıseıiniń muǵalimi Tatána Beloýsova Global Teacher Prize nusqasy boıynsha álemniń úzdik 50 pedagoginiń qataryna endi.
Konferensıa aıasynda bilim berý salasynyń úzdik ókilderi marapattaldy. Kásibı sheberligi, kópjyldyq eńbegi jáne óskeleń urpaqty tárbıeleýge qosqan úlesi úshin pedagogterge Almaty ákiminiń alǵys hattary men Qazaqstan Respýblıkasy Oqý-aǵartý mınıstrliginiń vedimistik nagradalary tabystaldy. Sondaı-aq, qalanyń úzdik bilim berý uıymdary anyqtaldy: Ybyraı Altynsarın atyndaǵy №159 gımnazıa úzdik orta bilim berý uıymy dep tanylyp, qala ákiminiń 68 mln teńge kólemindegi grantyna sertıfıkat aldy. Almaty tehnologıalyq koleji úzdik tehnıkalyq jáne kásiptik, orta bilimnen keıingi bilim berý uıymy dep tanylyp, oǵan da materıaldyq-tehnıkalyq bazany damytýǵa jáne ǵylymı-ádistemelik qamtamasyz etýge 68 mln teńge kóleminde grant bólindi.
Konferensıa qorytyndysy boıynsha jańa oqý jylyna arnalǵan negizgi mindetter – oqýshylardyń bilim sapasyn arttyrý, pedagogterdiń kásibı damýyn qamtamasyz etý, mektep basshylarynyń jaýapkershiligin kúsheıtý jáne bilim berý uıymdaryna ataýly qoldaý kórsetý aıqyndaldy.
