Bolat Ótemuratov Qory Almaty qalasyndaǵy turǵyn úılerdi gazben jabdyqtaýǵa baǵyttalǵan mańyzdy áleýmettik jobaǵa 460 mln teńge kóleminde qaıyrymdylyq kómek kórsetti, - dep habarlaıdy alnews.
Jeke sektordaǵy úılerdi gazben jabdyqtaý jobasy Almaty qalasynyń ákimdigimen birlesip júzege asyrylady. Alǵashqy kezeńde taraptar ózara is-qımyldyń negizgi baǵyttaryn aıqyndaıtyn memorandýmǵa qol qoıdy. Jeke úılerdi gazǵa qosýdyń biryńǵaı tásiline sáıkes ákimdik úılerdi tekserip, turǵyndarǵa keńes beredi. Odan keıin bilikti merdiger uıymdar qajetti jumystardy júrgizedi. Bul rette, turǵyndarǵa gazben jylytý júıesine kóshýge jan-jaqty qoldaý kórsetiledi. Oǵan qarjylyq jáne uıymdastyrýshylyq máselesin sheshý, qajetti qujattardy rásimdeý jáne basqa da qoldaý sharalary kiredi.
«Almatyda jeke úılerdi gazben jabdyqtaý júıesine qosý boıynsha júıeli jumys jalǵasyp jatyr. Ár úıde máseleniń týyndaý sebepteri ártúrli bolýy múmkin. Sondyqtan tehnıkalyq jumystardy júrgizip qana qoımaı, turǵyndarǵa keńes berýden bastap, úılerdi gazǵa qosýǵa deıingi barlyq kezeńde qoldaý kórsetý mańyzdy. Áleýmettik jaýapkershiligi joǵary bıznestiń qoldaýy mundaı jumystyń aýqymyn keńeıtip, naqty máselelerdiń sheshilýin jedeldetýge múmkindik beredi», – dedi Almaty qalasynyń ákimi Darhan Satybaldy.
Jeke úılerdiń kómirden tabıǵı gazǵa kóshýi Almatydaǵy aýa sapasyn jaqsartý úshin de mańyzdy. Jylytý maýsymynda jeke sektorda qatty otyn jaǵý qorshaǵan ortaǵa taraıtyn lastaýshy zattardyń negizgi kózderiniń biri bolyp otyr.
«Biz úshin qala ınfraqurylymyn damytý jáne Almaty turǵyndaryna qolaıly jaǵdaı jasaýǵa baǵyttalǵan jobany qoldaý mańyzdy. Jeke sektordy gazdandyrý turǵyndarǵa zamanaýı jylytý júıesine kóshýge múmkindik beredi. Biz osy bastamany júzege asyrýǵa qoldaý kórsetip otyrǵanymyzǵa qýanyshtymyz», – dedi Bolat Ótemuratov Qorynyń bas dırektory Aınur Káribozova.
Aıta keteıik, bul Qordyń Almatydaǵy alǵashqy jobasy emes. Qalada Qor Botanıkalyq baqty, sondaı-aq QR Ulttyq ortalyq mýzeıiniń jeldetý jáne aýa baptaý júıesin jańǵyrtýdy qoldady. Sonymen qatar Almatyda Qordyń «Aýtızm. Barshamyzǵa bir álem» baǵdarlamasy aıasynda ashylǵan alǵashqy «Asyl Mıras» aýtızm ortalyqtarynyń biri jumys isteıdi. COVID-19 pandemıasy kezinde Qor densaýlyq saqtaý júıesine qoldaý kórsetti. Atap aıtqanda, PTR-testileýge arnalǵan mobıldi zerthanalar ornatyldy.
12 jyl ishinde Qor elimizdiń ár túrli óńirlerinde áleýmettik jobalardy júzege asyrdy. Olardyń qatarynda Esik pen Qosshydaǵy mektepter, Qyzylordadaǵy jańa áýejaı termınaly, Qosshydaǵy qomúnıtı ortalyǵy, Jezqazǵandaǵy «Shabyt» balalar men jasóspirimder shyǵarmashylyq ortalyǵy bar. Sonymen birge Qor bilim berý, densaýlyq saqtaý, ınklúzıa, mádenıet, ekologıa jáne tabıǵı apattardan zardap shekkenderge qoldaý kórsetý baǵyttarynda da birqatar bastamany júzege asyrdy. 2014 jyldan beri Qor áleýmettik jobalardy júzege asyrýǵa 250 mln dollardan astam qarjy bólgen.
