«Qazaqstan» shokolady
Qazaqstanda jasalǵan shokolad – elimizdiń kondıterlik salasynyń betkeustar ónimi. Shet eldik qonaqtarymyz óz jaqyndaryna arnap bul táttini jıi satyp alady. Dúken sórelerinde shokoladty plıtka túrinde nemese syılyq qaptamada kezdestire alasyz. Qazaqstandyq shokoladty elimizdegi kez kelgen sýpermarketten nemese fırmalyq dúkenderdiń birinen satyp alaýǵa bolady.
Qurt
Qurt – Ortalyq Azıany meken etken kóshpeli halyqtardyń dastarhanynan oryn tapqan aıtýly ónertabysy, nárli qyshqylsútti ónim. Qaıtalanbas dámge ıe bul taǵam Qazaq jerinde kóne zamandardan-aq jaqsy belgili. Qurt - aptap ystyqta taptyrmas azyq, onyń ústine esh búlinbeı, uzaq ýaqyt boıy saqtalady. Sáıkesinshe alys-jaqyn jerlerge bazarlyq dep qurt aparsańyz, syılyǵyńyzdyń jaramdylyǵyna esh alańdamasańyz bolady.
Qamshy
Ejelden qamshy kóshpendiler úıiniń mindetti jabdyǵy, bılik pen dáýlettiń belgisi bolyp tabylady. Qamshyny mura retinde ákeden balaǵa tabystaǵan. Sol sebepti de ony kıiz úıdiń erler jaıǵasqan bóligindegi keregege ilip qoıǵan. Nanym-senimge súıensek, qamshy zulymdyq pen jyn-shaıtannan qorǵaıdy. Teriden toqylǵan qamshy óte ádemi bolady, jáne óziniń bastapqy qalpyn uzaq jyldar boıyna saqtaıdy.
Kıizden jasalǵan kıim-keshek pen kádesyılar
Búginde kıizdiń 100% tabıǵı qoı júninen de, jasandy sıntetıkalyq jipten de jasalǵan túrleri bar. Kıizden tigilgen keýdesheler men úı shárkeıleri sýyqtan qorǵap, densaýlyqqa oń áser etedi. Sonymen qatar, zamanaýı qazaqstandyq qolóner sheberleri kıizden alýan túrli sándik zattar jasaıdy.
Sándik kıiz úıler
Sándik kıiz úı - kóshpendiler panalaǵan úıdiń kishireıtilgen kóshirmesi. Ádette tabıǵı kıizden jasalady.
Kıiz úı – otbasylyq bereke jáne adam men tabıǵat úılesimdiliginiń belgisi. Mundaı kádesyı ulttyq naqyshtaǵy zattardy erekshe baǵalaıtyn jaqyndaryńyzǵa unaıtyny sózsiz.
Dástúrli bas kıimder men ulttyq kıimder
Taqıa – qazaq halqynyń qoldanysyndaǵy eń ámbebap bas kıim. Ony jasy da, kárisi de, erler de, áıel adamdar de kıgen. Taqıa ulttyq oıý-órnekpen kómkerilip, monshaqtarmen bezendiriledi. Mata retinde jibek, barqyt, shuǵa, maqta-mata kezdemeleri qoldanylady.
Halqymyzda qurmetti qonaqqa shapan jaýyp, qamzol kıgizip, erekshe baǵaly kıim-keshekti syıǵa tartý dástúri saqtalǵan. Osyndaı salt-dástúrler qazaqı qonaqjaılylyqtyń shynaıy kórinisin aıqyn beıneleıdi. Eger qalaýyńyz ulttyq sanamyzdy arqaý etken zamanaýı kıim úlgilerine tússe, daryndy otandyq dızaınerlerdiń týyndylaryn tańdasańyz bolady. Ári mundaı joǵary talǵamdy kıimder sizdiń qurmetińizdi bildiretin keremet syılyq bolmaq.
Dombyra men shańqobyz
Uly Daladan qýat alǵan qazaq óneriniń bir bóligin syıǵa tartqyńyz kelse, ulttyq aspaptarymyzǵa nazar salyńyz.
Shańqobyz – kóne qazaq ulttyq mýzykalyq aspaby. Ol kólemi kishkene, tym názik.
Al elimizdegi eń keń taralǵan ulttyq aspap – dombyra desek, esh jańylyspaımyz!
«Naǵyz qazaq – qazaq emes, Naǵyz qazaq – Dombyra! Eki shektiń birin qatty, birin sál-pál kem bura»,- dep halqymyz erekshe qasterleıtin dombyra atam zamannan qazaq úıiniń tórinen oryn alǵan. Búginde dombyranyń kúmbirlegen kúıin tyńdap qana qoımaı, sol bir áýezdi estelikti kishigirim kádesyılarǵa syıdyryp, jaqyndaryńyzben bólisseńiz bolady.
