Osy demalys kúnderi Almatynyń Túrksib aýdanynda Rysqulov dańǵyly men Aıtyqov kóshesiniń qıylysynda jańa demalys kúngi jármeńke ashylady, - dep habarlaıdy alnews.
Jármeńkede Almaty oblysy Raıymbek aýdanynyń aýyl sharýashylyǵy taýaryn óndirýshileri óz ónimin usynady. Fermerlik sharýashylyqtardyń tikeleı qatysýy turǵyndardy deldalsyz, qoljetimdi baǵamen sapaly azyq-túlikpen qamtamasyz etýge múmkindik beredi. Kelýshiler sıyr, jylqy jáne qoı etin, sondaı-aq kartop, sábiz, pıaz, qyryqqabat, qıar, qyzanaq pen almany qosa alǵanda kókónis pen jemis-jıdekti satyp ala alady. Sonymen qatar jármeńkede sút ónimderi, bakaleıa taýarlary, jumyrtqa, shujyq ónimderi, bal, nan-toqash jáne kondıterlik ónimder, keptirilgen jemister men úı jaǵdaıynda daıyndalǵan nan-toqash ónimderi usynylady.
Jármeńkeniń ashylýy Almatynyń barlyq aýdanynda demalys kúngi jármeńkeler jelisin kezeń-kezeńimen keńeıtý aıasynda júzege asyrylýda. Qazirgi ýaqytta mundaı jármeńkeler Áýezov, Almaly, Medeý, Bostandyq jáne Jetisý aýdandarynda jumys isteıdi. Uıymdastyrýshy ári ákimshisi – «Almaty» ÁKK.
Sonymen qatar «Almaty» ÁKK demalys kúngi jármeńkelerdi kezeń-kezeńimen jańǵyrtý jumystaryn jalǵastyrýda. Qazirgi ýaqytta jumys Bostandyq aýdanyndaǵy Qazaqfılm shaǵynaýdanynda júrgizilýde. Jańartylǵan jármeńkeniń resmı ashylýy bıylǵy tamyz aıyna josparlanǵan. Sondaı-aq jańǵyrtý jumystary Áýezov aýdanynda da jalǵasýda. Osyǵan baılanysty Áýezov aýdanyndaǵy jármeńke ýaqytsha Rysqulbekov kóshesi, 33/2 mekenjaıyna kóshirildi.
Jańǵyrtý jumystary saýda alańdaryn keshendi jańartýdy kózdeıdi. Onyń aıasynda irgeles aýmaq kórkeıtilip, sanıtarlyq ınfraqurylym jańǵyrtylady, saýda konstrýksıalary aýystyrylyp, ınjenerlik jeliler tartylady. Kásipkerler men kelýshiler úshin qolaıly jaǵdaı jasaýǵa, sondaı-aq nysandardy qoldanystaǵy zańnama talaby men Almaty qalasynyń dızaın-kodyna sáıkestendirýge erekshe nazar aýdarylady.
Demalys kúngi jármeńke ár senbi jáne jeksenbi saǵat 09:00-den 18:00-ge deıin myna mekenjaılarda ótedi:
- Bostandyq aýdany – Qazaqfılm shaǵynaýdany;
- Áýezov aýdany – Rysqulbekov kóshesi, 33/2;
- Medeý aýdany – Meńdiqulov jáne Bekturov kósheleriniń qıylysy;
- Almaly aýdany – Masanchı kóshesi, Áıteke bı men Gogol kósheleriniń aralyǵy;
- Jetisý aýdany – Qulager shaǵynaýdany;
- Túrksib aýdany – Rysqulov dańǵyly men Aıtyqov kóshesiniń qıylysy.
