Óńirlik komýnıkasıalar qyzmeti Jetisý aýdanynyń ákimi Lázzat Jylqybaevamen birlesip baspasóz týryn uıymdastyrdy, - dep habarlaıdy alnews.
Onda jýrnalıserge bıyl aýdanda júzege asyp jatqan negizgi abattandyrý jobalaryn tanystyryp, qoǵamdyq keńistikti damytý men qalalyq ortany jaqsartýǵa bıznestiń qalaı úles qosyp jatqanyn baıandap berdi.
Sońǵy jyldary Jetisý aýdany aıtarlyqtaı jańardy. Munda jańa alańqaılar boı kóterip, aýlalar jańaryp, serýendeý men demalysqa arnalǵan jańa qoǵamdyq keńistik ashylyp jatyr. Aýdandy abattandyrýmen qatar qaýipsizdikti qamtamasyz etýge, kógaldandyrý men turǵyndardy sheshim qabyldaý úderisine tartýǵa erekshe kóńil bólinipti.
Jýrnalıserdiń birinshi bolyp aıaldaǵan jeri Jangeldın kóshesindegi alańqaı boldy. Lázzat Jylqybaevanyń aıtýynsha, turǵyndardyń aýmaǵy 2,2 gektar bolatyn bul aýmaqty jańartýdy suraǵanyna birneshe jyldaı bolypty. Sonyń endi reti kelgen eken.
«Qala ákiminiń tapsyrmasyna sáıkes, bıylǵy jyldyń maýsym aıynda saıabaqty qaıta jańǵyrtýdy bastadyq. Tamyz aıynyń sońyna deıin barlyq jumys aıaqtalyp, jańartylǵan qoǵamdyq keńistik eldiń ıgiligine beriledi», – dep túsindirdi jýrnalıserge aýdan ákimi.
Qaıta jańǵyrtý kezinde munda jınaqtaýshy rezervýarlar arqyly jumys isteıtin avtomatty sýarý júıesi tolyq qalpyna keltirildi. Balalardyń oıyn alańy jańartylyp, jaryqtandyrý júıesi edáýir kúsheıtildi. Buryn 40 sham bolsa, endi onyń sany 200-ge jetip jyǵylǵan. Qaýipsizdikti qamtamasyz etý úshin 20-dan astam beınebaqylaý kamerasy ornatylyp, olardy aýdan ákimdigi men Polısıa departamenti táýlik boıy baqylap otyratyn boldy.
Alańqaıda sándik jaryq elementteri, pıkseldi aqparattyq ekran, jańa oryndyq pen qoqys jáshikteri ornatylady. Bar aǵashty saqtaý men kógaldandyrý máselesine nazardan tys qalmaı, olardyń jaı-kúıin ekologıa jáne qorshaǵan orta basqarmasynyń mamandary baqylap otyr.
Kelesi nysan – «Halyq qatysatyn búdjet» baǵdarlamasy aıasynda abattandyrylǵan Ratýshnyı kóshesindegi aýlalar boldy. Lázzat Jylqybaevanyń aıtýynsha, Jetisý aýdanynyń turǵyndary bul baǵdarlamaǵa jyl saıyn joǵary belsendilik tanytyp keledi.
«Ótken jyly aýdan turǵyndarynan 1319 ótinish tústi. Sonyń ishinde eń úlken 25 joba iriktelip, qazir iske asyp jatyr. Sonyń biri – Ratýshnyı kóshesindegi osy aýlalardy abattandyrý jobasy», – deıdi aýdan ákimi.
Joba aıasynda balalar men sport alańy jańartylyp, jańa qorshaýlar ornatyldy, avtomatty sýarý júıesi júrgizilip, landshaftyq bezendirý jumysy atqaryldy. Egilgen aǵash pen gúlderdi tańdaýdan bastap demalys pen oıyn aımaqtarynyń ornalasýyna deıingi barlyq sheshim turǵyndarmen birlesip qolǵa alyndy.
Turǵyndar atqarylǵan jumystyń nátıjesin joǵary baǵalap úlgerdi. Jaqynda jańartylǵan aýla keńistiginiń saltanatty ashylýy ótip, ol balalar men eresekterdiń jańa demalys ornyna aınaldy.
Jumystyń barysy týraly jýrnalıserge merdiger uıym – «Troıa» JSHS-niń dırektory Baqtıar Atajanov baıandady.
Onyń aıtýynsha, uzyndyǵy shamamen 280 metr bolatyn alańqaıda abattandyrý jumysy aıaqtalyp qalypty. Qazirdiń ózinde tolyqtaı tas tósenish tóselip, balalar men sport alańy, vorkaýt aımaqtary jabdyqtaldy, qaýipsiz rezeńke jabyn tóseldi. Jalpy aýmaǵy 6 myń sharshy metrge jýyq jerdi kógaldandyrý jumysy 80 paıyzǵa bitken.
«Avtomatty sýarý júıesi búkil aýmaqta jumys istep tur. Joba boıynsha kelisimshart merzimi qazan aıyna deıin bolǵanymen, biz bar jumysty tamyz aıynyń sońyna deıin aıaqtamaq oıdamyz», – dedi merdiger uıymnyń ókili.
Jobanyń ereksheligi retinde sándik álpınarıler jasalyp, ekostıl elementteri saqtalady. Burynnan ornatylǵan aǵash oryndyqtar qaıta qalpyna keltirilip, jańartylǵan alańqaıdyń kelbetine úılestirildi.
Baspasóz týrynyń kelesi nysany – Serikov kóshesi boldy. Munda bıznes pen memlekettiń tıimdi áriptestiginiń úlgisi júzege asyrylyp jatyr. Kóshege irgeles aýmaqty abattandyrý jumystary tolyqtaı Karina Paper kompanıasynyń qarajaty esebinen júrgizilmek.
Lázzat Jylqybaevanyń aıtýynsha, Jetisý aýdany Almatydaǵy eń úlken ónerkásiptik aýdan bolyp qala beredi. Munda 572 kásiporyn jumys isteıdi, onyń ishinde 51-i iri jáne orta óndiris orny eken.
Karina Paper kompanıasy bas dırektorynyń orynbasary Talǵat Sháripov Qazaqstan naryǵynda 28 jyldan beri jumys istep kele jatqan kásiporyn óndiristi damytýmen qatar, qalalyq ortany jaqsartýǵa da belsene aralasyp júrgenin aıtady.
Kompanıa jalpy aýmaǵy 44 myń sharshy metr bolatyn «A» sanatyndaǵy qoıma keshenin salý boıynsha iri ınvestısıalyq jobany júzege asyryp jatyr. Qurylys aıaqtalǵannan keıin 300-ge deıin jańa jumys orny ashylyp, búdjetke túsetin jyl saıynǵy salyq kólemi 1 mıllıard teńgeden aspaqshy.
Sonymen qatar kásiporyn óz aqshasyna Serikov kóshesiniń boıyndaǵy aýmaqty abattandyryp jatyr. Munda jańa jaıaý júrginshiler joly, kógaldandyrý jumysy, demalys oryndary men jańa jabyn salynady.
«Bul aýdan men qalanyń damýyna qosqan úlesimiz. Biz bıznesti damytyp qana qoımaı, turǵyndarǵa jaıly jaǵdaı jsaǵymyz keledi», – dedi kompanıa ókilderi.
Baspasóz týrynyń sońǵy nysany Úlken Almaty kanaly (ÚAK) boldy. Qazir munda aýqymdy abattandyrý jumysy júrgizilip jatyr eken.
Jobanyń bas ınjeneri Aıdyn Baıbolovtyń aıtýynsha, qala aýmaǵyndaǵy kanaldyń 90 paıyzy, al oǵan irgeles saıabaq aımaqtaryndaǵy jumystyń 95 paıyzy aıaqtalǵan. Onyń ishinde «Gúlder» saıabaǵy, Baým toǵaıy men basqa da qoǵamdyq keńistik bar.
Qazir negizgi jumys aıaqtalyp, jasyl jelek egilip, tas tósenish tóselgen. Joba tolyq aıaqtalǵanǵa deıin shaǵyn sáýlet nysandary men jaryqtandyrý júıesin ornatý jumystary júrgiziledi.
Kanalǵa sý jiberilgennen keıin bul aýmaq Almatydaǵy eń iri rekreasıalyq aımaqtardyń birine aınalady. Munda medısınalyq jáne polısıa beketteri, beınebaqylaý júıeleri men daýys arqyly habarlaý júıeleri jumys isteıdi. Demalys aımaqtaryndaǵy sýdyń tereńdigi shamamen bir jarym metrdi quraıdy, bul kelýshilerdiń qaýipsizdigin joǵary deńgeıde qamtamasyz etýge múmkindik beredi.
Baspasóz týry Jetisý aýdanynyń búginde aýqymdy jańǵyrý kezeńin bastan ótkerip jatqanyn aıqyn kórsetti. Memlekettik baǵdarlamalardyń, turǵyndardyń belsendi qatysýynyń jáne bıznestiń áleýmettik jaýapkershiliginiń arqasynda munda ómir súrýge, eńbek etip, demalýǵa qolaıly zamandyq qalalyq orta qalyptasyp keledi. Jańa saıabaqtar, abattandyrylǵan aýlalar, jańartylǵan kósheler men qoǵamdyq keńistikter búginde jaı ǵana ınfraqurylym nysany emes, myńdaǵan almatylyqtyń demalyp, kezdesý ótkizetin súıikti ornyna aınalyp barady.
