Almatyda Bas josparǵa engiziletin túzetýlerdiń strategıalyq ekologıalyq baǵalaýyna qatysty qoǵamdyq tyńdaýlar ótip jatyr, - dep habarlaıdy alnews.
Tyńdaý barysynda turǵyndardyń biri qujat ázirleýshilerden qalany kógaldandyrý baǵytynda atqarylǵan jumystarǵa júrgizilgen taldaýdyń naqty nátıjesin usynýdy surady. Onyń aıtýynsha, qala turǵyndaryn Almatynyń jasyl qorynyń qazirgi jaı-kúıi men onyń aýa sapasyna yqpaly týraly obektıvti baǵalaý qyzyqtyrady.
Bul suraqqa PhD doktory, belgili qazaqstandyq bıotehnolog-ǵalym Gúlnur Júnisova jaýap berdi. Onyń aıtýynsha, búgingi ahýalǵa jan-jaqty taldaý jasalǵan. Qazirgi tańda Almatydaǵy bir turǵynǵa shaqqandaǵy jasyl jelekpen qamtamasyz etý deńgeıi shamamen 5 sharshy metr. Bul belgilengen normatıvten edáýir tómen. Al mejeli kórsetkish – bir adamǵa shaqqanda 16 sharshy metr.
Sarapshynyń aıtýynsha, normatıvtik esepteý kezinde keıbir tabıǵı aýmaqtar qalanyń kógaldandyrý júıesiniń quramyna engizilmeıdi. Sondyqtan olar jalpy statısıkalyq kórsetkishte esepke alynbaıdy.
«Belgilengen mejege qol jetkizý úshin Bas josparda jasyl jelek kólemin edáýir ulǵaıtý kózdelgen. Osy maqsatta jyl saıyn 10 myńnan astam aǵash egý josparlanyp otyr. Bul rette jergilikti tabıǵı jaǵdaıǵa beıimdelgen ósimdik túrlerine basymdyq beriledi», – dedi spıker.
Gúlnur Júnisovanyń aıtýynsha, mundaı tásil qalanyń kógaldandyrý deńgeıin arttyryp qana qoımaı, qala ekojúıesiniń jaǵdaıyn jaqsartýǵa, bıologıalyq alýan túrlilikti saqtaýǵa jáne qaladaǵy qustar men janýarlardyń tirshilik etýine qolaıly orta qalyptastyrýǵa múmkindik beredi.
Sonymen qatar qaladaǵy jasyl beldeýdi ózen jaǵalaýlaryn kógaldandyrý jáne jasyl jelek alqaptaryn ulǵaıtý arqyly damytý josparlanǵan. Josparda İle Alataýy memlekettik ulttyq tabıǵı saıabaǵynyń aınalasynda qorǵaý aımaǵyn belgileý, turǵyndar jıi baratyn shatqaldardaǵy demalys júktemeni retteý, sondaı-aq sırek kezdesetin janýarlar túrlerine monıtorıń júrgizý baǵdarlamalaryn keńeıtý kózdelgen. Ekologıalyq táýekelderdi azaıtý maqsatynda Bas josparda tabıǵı aýmaqtar arasyndaǵy janýarlardyń erkin qonys aýdarýyna múmkindik beretin ekologıalyq dálizder júıesin qurý da qarastyrylǵan.
