Almatynyń Belsendi uzaq ómir súrý ortalyqtarynda jyl basynan beri 333 myńǵa jýyq qyzmet kórsetildi

Almaty qalasy Jumyspen qamtý jáne áleýmettik baǵdarlamalar basqarmasyna qarasty «Almaty qalasynyń Belsendi uzaq ómir súrý ortalyǵy» KMM-de jáne aýdandyq Belsendi uzaq ómir súrý ortalyqtarynda jyl basynan beri shamamen 333 myń qyzmet kórsetildi. Bul týraly qalalyq Jumyspen qamtý jáne áleýmettik baǵdarlamalar basqarmasynyń ókilderi aıtty.
 
«Almaty qalasynyń Belsendi uzaq ómir súrý ortalyǵy» komýnaldyq memlekettik mekemesi 2022 jyly quryldy. Zeınet jasyndaǵy azamattarǵa kórsetiletin áleýmettik qyzmetterge suranystyń artýyna baılanysty 2024 jyldyń aqpan aıynan bastap qalalyq ortalyqtyń úsh bólimshesi ashyldy. Onyń ekeýi Bostandyq aýdanynda, bireýi Medeý aýdanynda ornalasqan. Bul bólimshelerge kún saıyn shamamen 500 adam keledi.
 
Jyl basynan beri ortalyqqa 13 302 zeınetker júginip, olarǵa 48,4 myńnan astam qyzmet kórsetildi.
 
Sonymen qatar Almaty qalasy ákimdikteriniń janynan memlekettik áleýmettik tapsyrys aıasynda úkimettik emes uıymdar bazasynda jumys isteıtin 18 aýdandyq Belsendi uzaq ómir súrý ortalyǵy qyzmet kórsetedi. Jyl basynan beri bul ortalyqtarǵa 8 834 adam júginip, olarǵa 284,7 myńnan astam qyzmet kórsetildi.
 
Ortalyqtardyń negizgi maqsaty – zeınet jasyndaǵy azamattardy belsendi qoǵamdyq, mádenı, shyǵarmashylyq, sporttyq jáne iskerlik ómirge tartý arqyly olardyń fızıkalyq jáne psıhıkalyq saýlyǵyn nyǵaıtyp, belsendi ómir súrý uzaqtyǵyn arttyrý.