Alataý aýdanynda buqaralyq aqparat quraldarynyń ókilderine arnalǵan baspasóz týry uıymdastyryldy, - dep habarlaıdy alnews.
İs-shara barysynda aýdan turǵyndarynyń ómir súrý sapasyn arttyrýǵa baǵyttalǵan ınfraqurylymdyq jáne áleýmettik jobalardyń júzege asyrylý barysy tanystyryldy.
Nysandardy Alataý aýdanynyń ákimi Danıar Qyryqbaev tanystyryp, jobalardyń iske asyrylý kezeńderi, áleýmettik mańyzy jáne aýdannyń aldaǵy damý múmkindikteri týraly aıtyp berdi.
Baspasóz týrynyń alǵashqy nysany Aqmarjan shaǵynaýdanynda ornalasqan №230 jalpy bilim beretin jańa mektep boldy. Zamanaýı bilim berý mekemesi 2 myń oqýshyǵa arnalǵan jáne tolyqqandy jumysyn bastaý úshin barlyq qajetti ruqsat qujattaryn alǵan.
«Búginde Alataý aýdanynda 35 mektep jumys isteıdi. Memleket basshysynyń tapsyrmasy aıasynda bıyl eki zamanaýı Keleshek mektebi paıdalanýǵa beriledi. Sonyń biri – 2 myń oqýshyǵa arnalǵan osy mektep. Qazirdiń ózinde munda 1700-den astam bala qabyldandy, al 1 qyrkúıekke qaraı mektep oqýshylardy tolyq qabyldaýǵa daıyn bolady. Árıne, aýdandaǵy oqýshy oryndarynyń tapshylyǵy máselesi áli de ózekti. Degenmen jańa mektepterdiń ashylýy qoldanystaǵy bilim berý uıymdaryna túsetin júktemeni edáýir azaıtady. Bıyl taǵy birneshe mektepti paıdalanýǵa berý josparlanyp otyr. Bul oqýshy oryndarynyń jetispeýshiligin aıtarlyqtaı qysqartýǵa múmkindik beredi. Aldaǵy jyldary da bul baǵyttaǵy jumys jalǵasady», – dedi Alataý aýdanynyń ákimi Danıar Qyryqbaev.
№230 mektep «Keleshek mektepteri» ulttyq jobasy aıasynda salyndy. Jobanyń basty maqsaty – qaýipsiz ári zamanaýı bilim berý ortasyn qalyptastyrý.
Mektep zamanaýı talaptarǵa saı jabdyqtalǵan. Munda ınformatıka, robototehnıka, fızıka, hımıa, bıologıa kabınetteri, STEM-zerthana, mamandandyrylǵan sheberhana, resýrstyq ortalyǵy bar kitaphana jáne keń demalys aımaǵy qarastyrylǵan. Erekshe bilim berý qajettiligi bar balalar úshin ınklúzıa kabınetteri men sensorlyq bólme jabdyqtalǵan.
Oqýshylardyń qaýipsizdigine erekshe kóńil bólingen. Mektepte beınebaqylaý jáne Face ID qoljetimdilikti baqylaý júıeleri engizilgen, sondaı-aq oqýshylardyń qozǵalysy jas erekshelikterine qaraı bólingen. Ǵımarat joǵary seısmıkalyq tózimdilikke ıe.
Mektep aýmaǵynda sport alańy, stadıon, workout aımaǵy, tenıs korty jáne amfıteatr salynǵan. Jańa bilim berý nysany №201 jáne №209 mektepterge túsetin júktemeni edáýir azaıtyp, shaǵynaýdan turǵyndaryn sapaly ári qoljetimdi bilim berý ınfraqurylymymen qamtamasyz etedi.
Baspasóz týrynyń kelesi nysany Nurkent shaǵynaýdanyndaǵy jańa qoǵamdyq keńistik boldy. Skverdi kóriktendirý jumystary bıyl mamyr aıynda bastalyp, qazirgi ýaqytta belsendi kezeńde júzege asyrylýda.
Joba balalar men eresekterge arnalǵan jaıly ári zamanaýı demalys ornyn qurýdy kózdeıdi. Munda serýen aleıalary, demalys aımaǵy, zamanaýı shaǵyn sáýlet nysandary, balalar oıyn alańy, jasyl jelek jáne avtomatty sýarý júıesi salynady.
«Jumystar 26 mamyrda bastaldy jáne belgilengen merzimde aıaqtalady. Qaıta jańǵyrtý aıaqtalǵannan keıin munda jaılylyq pen qaýipsizdiktiń barlyq talabyna saı keletin zamanaýı qoǵamdyq keńistik qalyptasady. Otbasylyq demalys pen sportpen aınalysýǵa qolaıly orta qurýǵa erekshe kóńil bólinip otyr. Jobada qarastyrylǵan barlyq qurylym kezeń-kezeńimen aıaqtalady. Kóriktendirý jumystary tolyq bitken soń bul oryn aýdan turǵyndarynyń súıikti demalys oryndarynyń birine aınalatynyna senimdimin», – dedi Danıar Qyryqbaev.
Joba aıasynda 5,8 myń sharshy metrden astam kespetas tóselip, 22 myń sharshy metrden astam kógal egilmek. Sondaı-aq 4,3 myńnan astam buta otyrǵyzyldy. Turǵyndardyń qolaılyǵy úshin 40 oryndyq pen qoqys jáshigi, 21 shaǵyn sáýlet nysany jáne syrtqy jaryqtandyrýdyń 120 tiregi ornatylady. Jumys aıaqtalǵannan keıin skver turǵyndardyń demalys jáne bos ýaqytyn ótkizýge arnalǵan jańa qoǵamdyq keńistikke aınalady.
Merdiger uıymnyń dırektory Dıdar Qonysbaevtyń aıtýynsha, kóriktendirý jobasy aıasynda shamamen 3,5 gektar aýmaqta zamanaýı qoǵamdyq keńistik salynyp jatyr. Ol jaqyn mańdaǵy turǵyn úılerde turatyn 1 800-den astam turǵynnyń jaıly demalýyna múmkindik beredi.
«Qazirgi ýaqytta qurylys jumystary jalǵasyp jatyr. Negizgi jumystardy qyrkúıek aıynda aıaqtaýdy josparlap otyrmyz. Bizdiń maqsatymyz – turǵyndardyń suranysyna saı keletin jaıly ári zamanaýı qoǵamdyq keńistik qalyptastyrý», – dedi merdiger uıym ókili.
Baspasóz týrynyń sońǵy nysany Terekti shaǵynaýdany boldy. Munda sýmen jabdyqtaý jáne sý burý jelilerin damytýǵa arnalǵan aýqymdy joba júzege asyrylýda. Jobanyń maqsaty – turǵyndardy zamanaýı ınjenerlik komýnıkasıalarmen qamtamasyz etip, aýdannyń ózekti máseleleriniń birin sheshý.
Merdiger uıymnyń málimetinshe, joba aıasynda jalpy uzyndyǵy 92 shaqyrymnan asatyn sý qubyry jáne káriz jelileri salynady. Qazirgi ýaqytta jumystardyń edáýir bóligi oryndalǵan. Joba aıaqtalǵannan keıin shamamen 9 myń adam turatyn 1700-ge jýyq jeke turǵyn úı ortalyqtandyrylǵan sýmen jabdyqtaý jáne sý burý júıesine qosylady.
Aýdan ákiminiń aıtýynsha, turǵyndardy sapaly ınjenerlik ınfraqurylymmen qamtamasyz etý – aýmaqty damytýdyń basym baǵyttarynyń biri. Joba tolyq aıaqtalǵannan keıin Terekti shaǵynaýdany ortalyqtandyrylǵan sý qubyry jáne káriz júıelerimen tolyq qamtylyp, turǵyndardyń ómir súrý jaılylyǵy artyp, negizgi komýnaldyq qyzmetterdiń bolmaýyna baılanysty áleýmettik máseleler sheshimin tabady.
Baspasóz týryn qorytyndylaǵan Danıar Qyryqbaev Alataý aýdany búginde megapolıstiń eń qarqyndy damyp kele jatqan aýmaqtarynyń biri ekenin atap ótti. Onyń aıtýynsha, aýdanda bilim berý, qoǵamdyq keńistikterdi damytý jáne ınjenerlik ınfraqurylymdy jańǵyrtý baǵytyndaǵy iri jobalar qatar júzege asyrylyp jatyr. Bul jumystardyń barlyǵy turǵyndarǵa qolaıly qalalyq orta qalyptastyryp, halyqtyń ómir súrý sapasyn arttyrýǵa baǵyttalǵan.
