Almatydaǵy «Alataý» dástúrli óner teatrynyń aldyndaǵy alańda jańa Konstıtýsıanyń kúshine engen kúnine arnalǵan «Biz, birtutas Qazaqstan halqy..!» atty aýqymdy konsert ótti, - dep habarlaıdy alnews.
Almaty qalasy ákimdiginiń qoldaýymen uıymdastyrylǵan mádenı is-sharanyń basty maqsaty – qazaqstandyq qoǵamdaǵy birlik pen qoǵamdyq kelisim qundylyqtaryn nasıhattaý, Konstıtýsıanyń el ómirindegi mańyzyn keńinen dáripteý, sondaı-aq qala turǵyndary men qonaqtaryna kóterińki kóńil kúı syılaý.
Open-air formatynda ótken konsertte bir sahnada elimizdiń tanymal ánshileri men shyǵarmashylyq ujymdary óner kórsetti. Sahna tórinde «Abyroı» jáne «KeshYOU» toptary, Aıdana Medenova, Ziruza, «Alashuly» toby, Erke, Raim, Sadraddın jáne basqa da tanymal artıser án shyrqady. Olar patrıottyq shyǵarmalarmen qatar kópshilik súıip tyńdaıtyn hıtterin oryndap, kórermenderdiń ystyq yqylasyna bólendi. Sahnadan ónerpazdar jınalǵan qaýymdy jańa Konstıtýsıanyń kúshine engen kúnimen quttyqtap, Qazaqstanǵa beıbitshilik, turaqtylyq pen ósip-órkendeýine arnalǵan júrekjardy lebiz jetkizdi.
Kesh barysynda Almaty qalasy Qoǵamdyq keńesiniń múshesi Dıdar Dildábek, Almaty qalasynyń jastar qozǵalystarynyń jetekshisi Ermuhammed Palmaǵanbetov, «G35» stýdenttik ózin-ózi basqarý uıymynyń ókili Marıam Dýanbek jáne «Alashuly» tobynyń solısi Maqsat Rahmet sóz sóılep, Qazaqstan halqynyń birligi, qoǵamdyq kelisim men ózara qurmet memlekettiń turaqty damýynyń basty negizi ekenin erekshe atap ótti. Sondaı-aq, Konstıtýsıa – eldiń quqyqtyq negizderin aıqyndaıtyn, árbir azamattyń quqyǵy men bostandyǵyna kepildik beretin ári memlekettiń turaqty damýy men demokratıalyq qaǵıdattarynyń berik tiregi sanalatyn basty qujat ekeni aıtyldy.
Konsert sońynda myńdaǵan almatylyq pen qala qonaǵy súıikti ónerpazdarymen birge tanymal ánderdi qosyla shyrqap, erekshe jyly atmosferanyń bir bóligine aınaldy. «Biz, birtutas Qazaqstan halqy..!» konserti Konstıtýsıanyń el ómirindegi aıryqsha rólin aıqyndap qana qoımaı, turǵyndardy ortaq maqsat pen ulttyq qundylyq tóńiregine toptastyrǵan jarqyn mádenı kesh boldy.
