Pavlodar oblysy, Baıanaýyl aýdanynda jasóspirimder arasynda grek-rım kúresinen respýblıkalyq týrnır ótti. Atalǵan dodaǵa elimizdiń túkpir-túkpirinen kelgen jas sportshylar qatysyp, boz kilemde ózara myqtyny anyqtady. Týrnırde Almaty qalasyndaǵy Medeý aýdanyndaǵy demalys ortalyqtarynyń tárbıelenýshileri joǵary nátıje kórsetip, birneshe júldeli orynǵa ıe boldy.
Básekede dara shyqqan sportshylar:
· Turarbaı Zańǵar – 33 kg salmaqta İ oryn
· Saılaý Nurıslam – 38 kg salmaqta İİ oryn
· Qyzaıbaı Ospan – 35 kg salmaqta İİİ oryn
· Baýrjan Batyrjan – 38 kg salmaqta İİİ oryn
· Muhamjan Aıbek – 41 kg salmaqta İİİ oryn
«Bul – bizdiń sportshylarymyz úshin úlken tájirıbe mektebi. Balalar osyndaı respýblıkalyq deńgeıdegi týrnırlerge qatysý arqyly óz qabiletterin shyńdap, bolashaqta halyqaralyq arenalarda el namysyn qorǵaı alatyn myqty sportshylarǵa aınalatynyna senemiz», – deıdi jattyqtyrýshylar.
Aıta keteıik, Almaty qalasyndaǵy demalys ortalyqtarynyń jumysy Almaty qalasy Jastar saıasaty basqarmasynyń qoldaýymen júzege asyrylady. Medeý aýdanyndaǵy ortalyqtarda tárbıelenip jatqan jasóspirimderge turaqty túrde sporttyq úıirmeler men jattyǵýlar uıymdastyrylyp, olardyń jan-jaqty damýyna jaǵdaı jasalyp otyr.
