Almatyda 500-den astam jas qaladaǵy barlyq komúnıtı ortalyqtarda ótken LEVEL UP zıatkerlik oıyndarynyń serıasyna qatysty. Bul týraly Almaty qalasy Jastar saıasaty basqarmasynyń ókilderi aıtty.
Kvız ALMA LOVE 2026 qalalyq festıvali aıasynda uıymdastyryldy. Qatysýshylar suraqtarǵa jaýap berip qana qoımaı, kúndelikti ómirde kezdesetin túrli jaǵdaılardy birge talqylady. Atap aıtqanda, senimdi aqparatty manıpýlásıadan ajyratý, qarjyny tıimdi basqarý, qoǵamdyq bastamalarǵa qatysý jáne qala ómirine yqpal etetin sheshim qabyldaý jaıy qarastyryldy.
Suraq pen komandalyq tapsyrma jastar saıasaty, eriktilik, sıfrlyq saýattylyq, otbasylyq qundylyqtar, bilim berý jáne ekologıalyq jaýapkershilik taqyryptaryn qamtydy.
«Kvız oıyny bilimimizdi synap qana qoımaı, kóptegen qoǵamdyq máselege jańasha kózqaraspen qaraýǵa múmkindik berdi. Osyndaı jobalar jastardyń jeke jaýapkershiliktiń mańyzyn túsinýine, aqparatty saralaı bilýine jáne qoǵamnyń bolashaǵyna áser etetin sanaly sheshim qabyldaýyna yqpal etedi», – dedi jobaǵa qatysýshylardyń biri Aıaýlym Nurlanqyzy.
Baǵdarlama eki baǵytqa bólindi. Birinshi baǵyt – «Qaldyqsyz utymdy tutyný» – resýrstardy uqypty paıdalaný, qaldyq kólemin azaıtý jáne ekologıalyq daǵdylardy qalyptastyrýǵa arnaldy. Ekinshi baǵyt – «Sanaly tańdaý» – azamattyq jaýapkershilik, synı oılaý jáne jastardyń qoǵamdyq ómirge qatysý máselesin qamtydy.
Aıta keteıik, ALMA LOVE 2026 festıvali Almaty qalasy Jastar saıasaty basqarmasynyń qoldaýymen 12 tamyzǵa deıin jalǵasady. Festıvál Halyqaralyq jastar kúnine oraı uıymdastyrylyp, mádenı, bilim berý, sport, ekologıa jáne áleýmettik baǵyttaǵy is-sharalardy biriktiredi.
