Túrksib aýdanyndaǵy 2000-ǵa jýyq oqýshy Qazaqstannyń Respýblıka kúnine arnalǵan jańa «Respýblıka kúni» ánin oryndady, - dep habarlaıdy alnews.
Ánniń avtory – №6 Oqýshylar úıiniń pedagogi, kompozıtor Birjan Álkeev. Týyndy «Elimniń jarqyn bolashaǵy: Birlik. Rýh. Táýelsizdik!» atty aýqymdy patrıottyq is-shara aıasynda shyrqaldy.
İs-sharany Túrksib aýdandyq bilim bólimi, №6 Oqýshylar úıi jáne aýdandaǵy 32 mektep birlesip uıymdastyrdy. 2000-ǵa jýyq oqýshy bir mezette Qazaqstan Respýblıkasynyń Memlekettik Ánuranyn, sondaı-aq «Respýblıka kúni» jáne «Atameken» ánderin oryndady.
İs-sharanyń erekshe kórinisteriniń biri – «Jandy tý» kompozısıasy. Kógildir jáne sary tústi jeıde kıgen oqýshylar alańǵa sap túzep, Qazaqstannyń Memlekettik Týynyń beınesin jasady.
Kórermenderdiń erekshe nazaryn №83 gımnazıanyń qazaq halyq aspaptarynan quralǵan «Shabyt» orkestriniń óneri aýdardy. Ujym ulttyq mýzyka mádenıetiniń baı murasyn pash etti.
Sonymen qatar art-chellendj aıasynda 500 jas sýretshi Qazaqstannyń mádenı murasyna, ulttyq dástúrine jáne elimizdiń jarqyn bolashaǵyna arnalǵan týyndysyn usyndy.
