27 qyrkúıekte Almatyda mereıtoılyq Almaty Marathon ótedi, - dep habarlaıdy alnews.
Bıyl halyqaralyq júgirý dodasyna 60-tan astam memleketten 16 myń adam qatysady dep josparlanyp otyr. Marafondy Almaty ákimdiginiń qoldaýymen «Birinshi bolý batyldyq» korporatıvtik qory uıymdastyrady. Bul jóninde qalalyq Sport basqarmasynyń ókilderi málimdedi.
Jarysqa álemniń ár qıyrynan sportshylar keledi. Eń shalǵaı núkteler qatarynda Býenos-Aıres, San-Paýlý, Oklend, Sıdneı, Keıptaýn, Vankýver jáne Toronto bar. Qazirgi derekke sáıkes, sheteldik qatysýshylardyń kóbi Reseı, Qyrǵyzstan, Ózbekstan jáne Qytaıdan keledi. Budan bólek, Ońtústik Koreıa, AQSH, Ulybrıtanıa, Belarýs, Germanıa, Ýkraına jáne ózge memleketterdiń júgirýshileri tirkelgen.
Marafonnyń tanymal sheteldik qatysýshylarynyń biri – 2018 jylǵy Boston marafonynyń jeńimpazy Iýkı Kavaýchı. Japonıalyq sportshy Qazaqstan men Ortalyq Azıaǵa alǵash ret kelip, Almatyda 42,2 shaqyrymdyq marafon qashyqtyǵyn baǵyndyrady.
Mereıtoılyq jarysqa baılanysty barlyq qashyqtyqtyń baǵyty jańartylǵan. 42,2 shaqyrymdyq marafon trassasy bıyl alǵash ret bir aınalymnan turady. Júgirýshiler Abaı dańǵylymen Momyshuly kóshesine deıin jetip, keri baǵytta qozǵalady. Odan ári marshrýt Dostyq dańǵyly, Bógenbaı batyr, Qabanbaı batyr, Shevchenko, Qurmanǵazy, Naýryzbaı batyr jáne Sátbaev kósheleri arqyly ótedi. Jarys Abaı alańynan bastalyp, Respýblıka alańynda márege jetedi.
Ótken jyly Almaty Marathon-ǵa 60 memleketten 1 363 sheteldik sportshy qatysqan. Jarystan keıin júrgizilgen saýalnamada olardyń 79,3%-y Almatyǵa taǵy da kelýge nıetti ekenin bildirgen.
Almaty Marathon Halyqaralyq marafondar men júgirýler qaýymdastyǵynyń (AIMS) halyqaralyq kúntizbesine engizilgen. Sondaı-aq jarys túrki halyqtarynyń marafondaryn biriktiretin TAN alánsynyń quramyna kiredi.
Almaty Marathon 2026 aıasyndaǵy 42,2 jáne 21,1 shaqyrymdyq qashyqtyqtarǵa qatysý úshin tirkelý marafonnyń resmı saıtynda áli de jalǵasyp jatyr.
