AI Talents Almaty bilim berý jobasynyń jeńimpazdary halyqaralyq tehnologıalyq alańda Qazaqstan atynan óner kórsetý, jasandy ıntellekt jónindegi konferensıaǵa qatysý jáne osy saladaǵy álemdik ázirlemelermen tanysý úshin AQSH-qa attandy, - dep habarlaıdy alnews.
AI Talents Almaty – oqýshylarǵa baǵdarlamalaý men jasandy ıntellekt negizderin úıretýge baǵyttalǵan bilim berý jobasy. Baǵdarlama Almaty qalasynyń Sıfrlandyrý basqarmasynyń qoldaýymen júzege asyrylyp jatyr. Oǵan IT salasynda buryn tájirıbesi bolmaǵan balalar da qatysa alady.
Oqý baǵdarlamalaý negizinen bastalyp, birtindep qosymsha, sıfrlyq servıs pen jasandy ıntellekt agentterin ázirleýge ulasady. Oqýshylar kásibı mentorlardyń jetekshiligimen zamanaýı quraldardy meńgerip, úderisterdi avtomattandyrýdy jáne naqty mindetterdi sheshýge arnalǵan tehnologıalyq sheshimder ázirleýdi úırenedi.
«Baǵdarlama tájirıbelik oqytýǵa negizdelgen. Oqýshylar baǵdarlamalaý negizderin meńgerip, jasandy ıntellekt quraldaryn qoldanýdy, sıfrlyq ónimder ázirleýdi jáne óziniń jasandy ıntellekt agentterin jasaýdy úırenedi. Qatysýshylarǵa kásibı mentorlar men IT ındýstrıasynyń sarapshylary kómektesedi. Al alǵan bilimin hakatondarda jáne joba ázirleý barysynda qoldanady», – dedi Almaty qalasy Sıfrlandyrý basqarmasynyń basshysy Nurqanat Sábıt.
Joba aıasyndaǵy bastapqy testileýden 10 myń oqýshy ótti. Olardyń arasynan 1 500 oqýshy tereńdetilgen oqýǵa irikteldi. Myńnan astam qatysýshy kýrsty aıaqtap, Junior ázirleýshi sertıfıkat aldy jáne óziniń sıfrlyq ónimderin tanystyrdy.
Tájirıbelik baǵdarlama aıasynda úsh hakaton oflaın formatta uıymdastyryldy. Qatysýshylar onda jobalar ázirlep, olardy sarapshylar aldynda qorǵady. AITK Fest 2026 qorytyndysy boıynsha Kremnıı alqabyna barý múmkindigine ıe bolǵan 11 jeńimpaz anyqtaldy.
AQSH-ta oqýshylar NVIDIA kompanıasynyń tehnıkalyq baǵdarlamalar jónindegi aǵa menedjeri Abhıdjıt Djoshımen (Abhijeet Joshi) kezdesip úlgerdi.
Sapardyń basty oqıǵalarynyń biri 3–6 qarasha aralyǵynda ótip jatqan TechEquity AI Summit 2026 konferensıasyna qatysý. 5 qarashada jasandy ıntellektini damytýǵa jáne ony túrli salalarda qoldanýǵa arnalǵan konferensıaǵa barý josparlanǵan. Baıandamashylar qatarynda NVIDIA, Google, Google DeepMind, Snowflake, Meta, IBM, Adobe kompanıalary men Stenford ýnıversıtetiniń sarapshylary bar.
Sonymen qatar almatylyq oqýshylar Company Brain Hackathon hakatonyna qatysyp, alǵan bilimin is júzinde qoldanýǵa jáne basqa ázirleýshilermen tájirıbe almasýǵa múmkindik alady.
Sapar baǵdarlamasyna Stenford ýnıversıteti men Berklıdegi Kalıfornıa ýnıversıtetine (UC Berkeley) barý, olardyń ǵylymı-zertteý baǵyttarymen jáne bilim alý múmkindikterimen tanysý da engizilgen.
Qatysýshylar California PATH zertteý baǵdarlamasynyń 40 jyldyǵyna arnalǵan PATH@40 halyqaralyq is-sharasyna da barady. Munda jasandy ıntellekt, júrgizýshisiz kólik jáne zıatkerlik qalalyq ınfraqurylym salalaryndaǵy ázirlemeler tanystyrylady.
Bul sapar oqýshylarǵa jetekshi tehnologıalyq kompanıalar men ýnıversıtetterdiń jumysymen tanysýǵa, ázirlemesin usynýǵa jáne halyqaralyq kásibı is-sharalarǵa qatysý tájirıbesin jınaqtaýǵa múmkindik beredi.
