6-8 qarasha Almatydaǵy Natalıa Sas atyndaǵy memlekettik akademıalyq orys balalar men jasóspirimder teatry kórermenderdi qaıta qabyldaıdy, - dep habarlaıdy alnews.
Jańartylǵan keshenniń ashylýyna oraı arnaıy baǵdarlama ázirlendi. Kórermender «Etik kıgen mysyq» mýzykalyq ertegisin, «Shekspırge degen qushtarlyq» komedıasyn jáne «SAS. Úıge oralý» gala-qoıylymyn tamashalaı alady.
Tarıhı ǵımarattyń sáýlettik kelbeti saqtalyp, ishindegi ınjenerlik jeliler, dybys, jaryq jáne sahna jabdyqtary jańǵyrtyldy. Restavratorlar mozaıkalyq kompozısıalardy, mármár betterdi jáne ıntererdiń basqa da qurylymdaryn qalpyna keltirdi. Negizgi sahna zamanaýı tehnıkalyq quraldarmen jabdyqtalyp, qoıylym qoıý múmkindikteri keńeıdi.
Teatrdyń janynan Qazaqstan men Reseıdiń eńbek sińirgen qaıratkeri, 1986-2005 jyldary teatrdy basqarǵan Borıs Preobrajenskıı atyndaǵy shaǵyn sahnasy bar jańa ǵımarat salyndy.
260 kórermenge arnalǵan zal Black Box formatynda jasalǵan. Onyń basty ereksheligi – qoıylymnyń mazmunyna qaraı sahna men kórermen oryndarynyń ornalasýyn ózgertýge bolady.
Jańa ǵımaratta bir úlken jáne eki shaǵyn daıyndyq zaly, balet synyby men kórkemdik-óndiristik sheberhana jabdyqtalǵan.
Kishkentaı kórermender úshin Baby Hall keńistigi ashylady. Munda balalar teatr álemimen tanysa alady. Sonymen qatar kitap oqýǵa jáne shyǵarmashylyq kezdesýler ótkizýge arnalǵan Book Hall men «Sats ComUnity» balalar stýdıasynyń oqý teatry jumys isteıdi.
Endi teatr negizgi jáne shaǵyn sahnalarda qoıylymdardy qatar kórsete alady. Al qosymsha bólmeler daıyndyq jumystaryna, balalar stýdıasynyń sabaqtaryna jáne shyǵarmashylyq kezdesýlerge paıdalanylady.
Ashylý baǵdarlamasy:
* 6 qarasha, saǵat 11:00 – «Etik kıgen mysyq» mýzykalyq ertegisi;
* 6 qarasha, saǵat 19:00 – «Shekspırge degen qushtarlyq» komedıasy;
* 7 qarasha – teatrdyń týǵan kúni men jańartylǵan ǵımarattyń ashylýyna arnalǵan «SAS. Úıge oralý» gala-qoıylymy;
* 7 jáne 8 qarasha, saǵat 12:00 – «Etik kıgen mysyq» mýzykalyq ertegisi;
* 7 jáne 8 qarasha, saǵat 18:00 – «Shekspırge degen qushtarlyq» komedıasy.
