Almatynyń atmosferalyq aýasyn qorǵaý qaǵıdalaryn engizý jónindegi jumys toby Shyǵys Eýropada tómen shyǵaryndylar aımaǵy – LEZ alǵash engizilgen Sofıa qalasynyń tájirıbesin zerdeledi, - dep habarlaıdy alnews.
Delegasıa quramyna Almaty Air Initiative, «Eco Almaty» JSHS, LEZ operatory – «Almaty Parkıng» KMK ókilderi, sondaı-aq Almatynyń atmosferalyq aýasyn qorǵaý qaǵıdalaryn ázirleý jáne engizý jónindegi jumys tobynyń músheleri kirdi. Sofıada olar mýnısıpalıtet ókilderimen, sarapshylarmen, qalalyq keńes depýtatymen jáne dárigerler qaýymdastyǵynyń ókilimen kezdesti.
Almaty Air Initiative málimetinshe, LEZ iske qosylǵannan keıin Sofıadaǵy ereje buzýshylyq sany shamamen 93% azaıǵan. Tómen ekologıalyq sanattaǵy avtokólikter sany táýligine shamamen 20 myńnan 2026 jylǵy aqpanda 1,3-1,4 myńǵa deıin tómendedi. Bul rette aıyppuldardy tolyq kólemde óndirip alý áli qoldanylǵan joq. Nátıjege avtomatty tirkeý, júrgizýshilerdi aqparattandyrý jáne habardar etý arqyly qol jetkizilgen.
Sapar barysynda Sofıanyń shekteýdi kezeń-kezeńimen engizý, aınalyp ótetin baǵyttardy uıymdastyrý, turǵyndarǵa áleýmettik qoldaý kórsetý, sıfrlyq ákimshilendirý jáne aýa sapasyn baqylaý tásilderi zerdelendi.
Halyqty qoldaý sharalaryna erekshe nazar aýdaryldy. Sofıada kómir men otyndy paıdalanýǵa engizilgen shekteý jylý jabdyqtaryn tegin aýystyrýmen qatar júrgizilgen. 2026 jyldyń basyna deıin shamamen 11 myń úı sharýashylyǵynda 20 myńǵa jýyq qurylǵy aýystyryldy.
Almaty Air Initiative atqarýshy dırektory Juldyz Sáýlebekovanyń aıtýynsha, delegasıa úshin bul joldan jýyrda ótken qalanyń tájirıbesin zerdelep, oǵan tikeleı qatysýshylarmen qandaı tetikterdiń tıimdi bolǵanyn, qandaı qıyndyqqa tap bolǵanyn jáne búginde neni basqasha jasar edi degen máselelerdi talqylaý mańyzdy boldy.
«Eco Almaty» JSHS bas dırektorynyń orynbasary Aıdana Qasenniń aıtýynsha, Sofıa tájirıbesi ekologıalyq shekteýdi kezeń-kezeńimen engizip, sonymen qatar halyqqa qoldaý kórsetken jaǵdaıda olardyń tıimdiligi joǵary bolatynyn kórsetti.
Qazir Almatyda Bógenbaı batyr – Abaı – Jeltoqsan – Dostyq kósheleri aýmaǵynda LEZ tehnıkalyq pılottyq jobasy júzege asyrylyp jatyr. 2026 jyly 31 jeltoqsanǵa deıin eshqandaı shekteý, aıyppul jáne kirý aqysy qarastyrylmaǵan.
Qazirgi kezeńde qala kameralardy, radarlyq sensorlar men kólikti taný júıelerin synaqtan ótkizip, kólik aǵyny týraly derekterdi aýa sapasynyń kórsetkishterimen sáıkestendirýde jáne tıisti qyzmetterdiń ózara is-qımylyn pysyqtap jatyr.
Sapar qorytyndysy boıynsha Almaty Air Initiative Almatyǵa arnalǵan usynymdar qamtylǵan taldamalyq esep ázirledi. Olardyń qatarynda lastaný kózderin aldyn ala anyqtaý, túrli basqarmalardyń deregin biriktirý, qoǵamdyq kólikti damytý, turǵyndarǵa ataýly qoldaý kórsetý jáne shekteý engizilgenge deıin sıfrlyq ákimshilendirý júıesin tolyq jolǵa qoıý bar.
