Almatyda jańa oqý jylyna qaraı stýdentter úshin jataqhanalarda, hostelderde jáne qonaq úılerde 61,2 myń oryn daıyndalady. Sonymen qatar sońǵy bir jylda stýdent jataqhanalaryndaǵy oryn tapshylyǵy tórt esege jýyq — 23,7 myńnan 5,7 myń orynǵa deıin qysqarǵan, - dep habarlaıdy alnews.
Qalada basqa óńirlerden kelgen stýdentterdi ornalastyrýǵa qalaı daıyndalyp jatqany týraly Almaty qalasynyń Óńirlik komýnıkasıalar qyzmetinde ótken brıfıńte qalalyq Jastar saıasaty basqarmasynyń basshysy Azız Kajdenbek aıtyp berdi.
Almaty elimizdiń eń iri bilim berý ortalyǵy bolyp qala beredi. Qazir qaladaǵy 35 joǵary oqý ornynda 221 myń stýdent bilim alady, onyń 149 myńy basqa óńirlerden kelgen jastar. Azız Kajdenbektiń aıtýynsha, stýdentterge arnalǵan turǵyn úıge degen suranys artyp keledi. 2026 jyly 30 094 memlekettik bilim berý granty bólindi. Bul ótken jylmen salystyrǵanda 700-ge, al 2024 jylmen salystyrǵanda 1 600-ge kóp. Sonymen qatar joǵary oqý oryndarynyń aqyly bólimderine qujat qabyldaý 28 tamyzǵa deıin jalǵasady. Sondyqtan stýdentterdiń naqty sany áli de naqtylanyp jatyr.
«Biz qazirdiń ózinde suranysty eskere otyryp, daıyndyq jumystaryn júrgizip jatyrmyz. Sońǵy bir jylda jataqhanalardaǵy oryn tapshylyǵy tórt esege jýyq qysqardy. Qazir Almatyda 136 stýdenttik jataqhana jumys isteıdi. Onyń 43-i 2023 jyldan beri paıdalanýǵa berilgen, al byltyr rekordtyq 4,5 myń oryn iske qosyldy. Búginde jataqhanalarda 46,2 myń stýdent turady. Bul ótken jylmen salystyrǵanda 6 myńǵa kóp. 2026 jyldyń sońyna deıin qalada taǵy 13 nysandy iske qosý josparlanyp otyr, olarda 4 658 oryn bolady. Sonymen qatar qala balama turǵyn úı qoryn da keńeıtip jatyr. Stýdentter úshin hostelder men qonaq úılerde 11 myń oryn qarastyrylǵan. Qosymsha rezervterdi joǵary oqý oryndarynyń ózderi de izdestirip jatyr. 1 qyrkúıekke deıin Almatyda jalpy 61,2 myń oryn daıyn bolady. Oǵan jataqhanalar, hostelder, qonaq úıler jáne joǵary oqý oryndarynyń ishki rezervteri kiredi», — dedi Azız Kajdenbek.
Jańa jataqhanalar salý da mańyzdy baǵyttardyń biri bolyp otyr. Bul iske ınvestorlar tartylady. 2023 jyldan bastap ákimdik bastamasymen Almatyda Jobalyq keńse jumys isteıdi. Onyń mamandary ınvestorlarǵa qoldaý kórsetip, ruqsat qujattaryn rásimdeýge jáne stýdenttik jataqhanalar qurylysyna alynǵan nesıeler boıynsha paıyzdyq mólsherlemelerdi sýbsıdıalaý tetikterin túsinýge kómektesedi.
Stýdentter jappaı qonystanatyn kezeńde qaladaǵy keńes berý ortalyqtardyń jumysy da kúsheıtildi. 10 tamyzdan bastap Qazaq ulttyq qyzdar pedagogıkalyq ýnıversıtetiniń bazasynda Bógenbaı batyr kóshesi, 142 mekenjaıynda Ahýaldyq ortalyq jumys isteıdi. Onyń janynda táýlik boıy jumys isteıtin baılanys ortalyǵy bar. Oǵan táýligine 1,5 myńnan astam qońyraý túsedi. Keńes alý úshin myna telefondarǵa habarlasýǵa bolady: +7 700 950 95 28, +7 727 237 01 70.
Stýdentterge qaı jerde ornalasýǵa bolatyny, jataqhanaǵa qalaı ótinish berý kerektigi, oryn berilmegen jaǵdaıda ne isteý qajettigi jáne qıyn jaǵdaı týyndaǵanda qaıda júginý kerektigi túsindiriledi. Osyndaı ortalyqtar Almatydaǵy barlyq joǵary oqý ornynda jumys isteıdi.
Taǵy bir shara - qonystaný kúnderi qandaı da bir sebeppen baspanasyz qalǵan stýdentterge ýaqytsha turǵyn úı usyný. 22 tamyzda Máýlenov kóshesi, 108A mekenjaıyndaǵy ALT Ýnıversıtetiniń №1 Stýdentter úıinde 50 oryndyq Daǵdarys ortalyǵy ashylady.
«Eger stýdent qonystaný kúni qandaı da bir sebeppen baspanasyz qalsa, eleýsiz qaldyrmaımyz. Ony ýaqytsha ornalastyryp, keıin turaqty turatyn jerin tabýǵa kómektesemiz», — dedi Azız Kajdenbek.
Stýdenttik jataqhanalarǵa qonystaný 25 tamyzda bastalady. Al joǵary oqý oryndaryndaǵy oqý úderisi 1 qyrkúıekte bastalady. Osy kezeńde qaladaǵy barlyq jaýapty qyzmetter kúsheıtilgen jumys rejımine kóshedi. Bul rette qalada tek bos oryndardyń sany ǵana emes, stýdentterdiń turý jaǵdaıy da baqylaýda bolady. Jyl saıyn jataqhanalar eki kezeń boıynsha tekseriledi. Oǵan qoǵam ókilderi, depýtattar, úkimettik emes uıymdar jáne eriktiler qatysady.
Bıyl monıtorıńtiń birinshi kezeńi 30 maýsym men 3 shilde aralyǵynda ótti. Tekserý nátıjesinde birqatar negizgi kemshilik anyqtaldy: bólmelerdegi ylǵaldylyq, jıhazdardyń tozýy, sý aǵýy jáne santehnıkadaǵy aqaýlar, terezeler men esikterdiń jaǵdaıy, sondaı-aq jataqhanalardy kórkeıtý jáne kútip ustaýǵa qatysty máseleler. Árbir anyqtalǵan kemshilik boıynsha joǵary oqý oryndaryna tıisti usynystar berildi. Qazir kemshilikter bekitilgen kestege sáıkes joıylyp jatyr. Odan keıin qaıta monıtorıń júrgiziledi.
«Biz úshin qajetti oryn sanyn qamtamasyz etý ǵana mańyzdy emes. Stýdentterdiń qandaı jaǵdaıda turatyny odan kem emes mańyzdy. Jataqhanalardyń jaǵdaıyna qatysty birde-bir eskertý nazardan tys qalmaıdy», — dedi spıker.
Jastar saıasaty basqarmasy ókilderiniń málimetinshe, qazirgi ýaqytta Almatyda stýdentterdi ornalastyrý máselesi baqylaýda. Qala basshylyǵy osy oqý jylyndaǵy qajettilikti tolyq qamtamasyz etip qana qoımaı, aldaǵy jyldary stýdentter sanynyń ósýi men turǵyn úıge degen suranysty aldyn ala eskerýge múmkindik beretin júıe qalyptastyrýdy josparlap otyr.
