Shilde aıynyń alǵashqy demalys kúnderi Almatyda dástúrli aýyl sharýashylyǵy jármeńkeleri ótedi, - dep habarlaıdy alnews.
Onda qala turǵyndaryna jańa jınalǵan ónimderdiń túr-túri usynylady. Otandyq fermerler men óndirýshilerdiń tikeleı jetkizýiniń arqasynda ónimder deldalsyz ári qoljetimdi baǵamen satylady.
«Almaty» áleýmettik-kásipkerlik korporasıasy uıymdastyratyn demalys kúnderi jármeńkeleri otandyq aýyl sharýashylyǵy taýaryn óndirýshilerge óz ónimderin tikeleı satýǵa múmkindik beredi. Jármeńkelerde 1000-nan astam túrli taýar usynylǵan. Olardyń qatarynda jańa pisken kókónister men jemister, et jáne sút ónimderi, jumyrtqa, bal, nan-toqash jáne kondıterlik ónimder, keptirilgen jemister men úıde daıyndalǵan nan ónimderi bar.
Jármeńkelerge Almaty qalasy, Almaty oblysy jáne Qazaqstannyń ózge óńirlerinen 300-den astam fermerlik sharýashylyq, aýyl sharýashylyǵy taýaryn óndirýshi jáne kásipker qatysady. Bul format tikeleı jetkizý júıesin damytýǵa, otandyq óndirýshilerdi qoldaýǵa jáne azyq-túlik baǵasynyń qoljetimdi deńgeıde saqtalýyna yqpal etedi.
Qazirgi tańda jármeńkeler Áýezov, Almaly, Medeý, Bostandyq jáne Jetisý syndy qalanyń bes aýdanynda jumys isteıdi.
Sonymen qatar Bostandyq jáne Áýezov aýdandaryndaǵy saýda alańdaryn jańǵyrtý jumystary jalǵasýda. Bul jumys aıasynda aýmaqtar kóriktendirilip, sanıtarlyq jaǵdaıdy jaqsartylady, saýda ınfraqurylymyn jańartylyp, saýda qatarlary retke keltiriledi.
Jóndeý jumystary júrgizilip jatqan kezeńde Áýezov aýdanyndaǵy jármeńke ýaqytsha Rysqulbekov kóshesi, 33/2 mekenjaıyna kóshirildi. Sondaı-aq, bıylǵy mamyr aıynda Jetisý aýdanyndaǵy Qulager shaǵynaýdanynda jańa jármeńke alańy jumysyn bastady.
Jyl basynan beri jármeńkelerde 16,5 myń tonnadan astam ónim satylyp, kelýshiler sany 85 myń adamnan asty. Orta eseppen aı saıyn munda shamamen 3 myń tonna ónim ótkiziledi. Byltyr bul kórsetkish 2,5 myń tonna bolǵan. Osylaısha, saýda kólemi shamamen 20%-ǵa ósip, jármeńkelerdiń qala turǵyndary arasynda tanymaldyǵy artyp kele jatqanyn kórsetip otyr.
Jármeńkeler ár senbi jáne jeksenbi kúnderi saǵat 09:00-den 18:00-ge deıin myna mekenjaılarda ótedi:
• Bostandyq aýdany — Qazaqfılm shaǵynaýdany;
• Áýezov aýdany — Rysqulbekov kóshesi, 33/2;
• Medeý aýdany — Meńdiqulov jáne Bekturov kósheleriniń qıylysy;
• Almaly aýdany — Masanchı kóshesi, Áıteke bı men Gogol kósheleriniń aralyǵy;
• Jetisý aýdany — Qulager shaǵynaýdany.
