Almatynyń Qala qurylysyn baqylaý basqarmasy Túrksib aýdanynyń Qaırat shaǵynaýdanynda ornalasqan bazardyń jalpy aýmaǵy 56 myń sharshy metrden asatyn saýda oryndaryn buzý jumystary bastalǵanyn habarlaıdy.
Buǵan deıin júrgizilgen tekserý barysynda «Statýs Construction» JSHS ruqsat qujattarynsyz jalpy aýmaǵy 56,4 myń sharshy metr bolatyn saýda oryndaryn salǵany anyqtaldy.
Menshik ıesine qatysty ákimshilik shara qabyldanyp, zańbuzýshylyqtardy joıý týraly nusqama berildi. Alaıda nusqama talaptary oryndalmaǵandyqtan, basqarma zańsyz nysandardy buzý týraly talap aryzben Almaty qalasynyń mamandandyrylǵan aýdanaralyq ekonomıkalyq sotyna júgindi. Osydan keıin sot talqylaýlary ótti.
Almaty qalalyq sotynyń qaýlysymen mamandandyrylǵan aýdanaralyq ekonomıkalyq sottyń zańsyz nysandardy buzý týraly sheshimi ózgerissiz qaldyryldy. İs materıaldary sheshimdi oryndaý úshin Ádilet departamentine joldandy.
Sot sheshimin oryndaý maqsatynda menshik ıesi nysandardy buzý jumystaryn óz betinshe bastady.
