Almatyda qala ákimi Darhan Satybaldynyń tapsyrmasyna sáıkes zańsyz qurylys nysandaryna baqylaý kúsheıtildi. Ásirese, nysanaly maqsaty jeke turǵyn úı salýǵa arnalmaǵan, onyń ishinde baǵbandyq nemese jeke qosalqy sharýashylyq júrgizýge berilgen jer telimderindegi qurylysqa erekshe nazar aýdarylýda.
Qurylys jumystary bastalǵan sátten bastap nysan paıdalanýǵa berilgenge deıingi barlyq kezeń baqylaýda bolady.
Qala qurylysyn baqylaý basqarmasynyń málimetinshe, jyl basynan beri Almatyda zańsyz salynǵan 52 nysan tolyq nemese ishinara buzylǵan.
Basqarma ókilderiniń aıtýynsha, 2026 jyly 1 shildeden bastap Qazaqstan Respýblıkasynyń jańa Qurylys kodeksiniń kúshine enýine baılanysty memlekettik sáýlet-qurylys baqylaýy men qadaǵalaý tetikteri de ózgerdi.
Buǵan deıin jeke turǵyn úı qurylysyna jeńildetilgen tártip qoldanylyp, mundaı nysandar basqa qurylys nysandary sekildi tolyq baqylaýmen qamtylmaıtyn. Jańa zańnama bul talaptardy ózgertti. Endi ruqsat berý rásimderine, qurylys aldyndaǵy jáne jobalyq daıyndyqqa qoıylatyn talaptar jańartyldy.
Bul másele Almaty úshin óte ózekti. Qalada nysanaly maqsaty jeke turǵyn úı qurylysyn qarastyrmaıtyn jer telimderinde turǵyn úı salý faktileri kezdesedi.
«Jer teliminiń bolýy onda kez kelgen maqsattaǵy nemese kez kelgen parametrdegi nysandy salýǵa avtomatty túrde quqyq bermeıdi. Qurylys jer teliminiń nysanaly maqsatyna, qala qurylysy reglamentterine jáne qoldanystaǵy zańnama talaptaryna sáıkes bolýǵa tıis», – dedi Qala qurylysyn baqylaý basqarmasynyń ókilderi.
