Almatyda qazaqstandyq jáne sheteldik ǵalymdar, fılosoftar, oqytýshylar men jas zertteýshilerdiń basyn qosqan «Qazaqstan qoǵamynyń fılosofıasy: qundylyq baǵdarlary men damý múmkindikteri» atty IV Qazaqstandyq fılosofıalyq kongres ótip jatyr. Bul týraly Almaty qalasy Jastar saıasaty basqarmasynyń ókilderi habarlady.
Kongres qatysýshylarynyń basty nazarynda ulttyq biregeılik, rýhanı-adamgershilik qundylyq, bilim berý salasyn damytý jáne sıfrlyq tehnologıanyń qazirgi qoǵamǵa áseri máseleleri tur. İs-shara baǵdarlamasy aıasynda plenarlyq otyrystar, ǵylymı pikirtalastar, dóńgelek ústelder men stýdenttermen kezdesýler uıymdastyrylǵan.
Kongreste jastar tárbıesine, mádenı murany saqtaýǵa jáne Qazaqstan Prezıdenti Qasym-Jomart Toqaev usynǵan «Adal azamat» tujyrymdamasynyń qaǵıdattaryna erekshe kóńil bólindi.
«Búginde jastar orasan zor aqparat aǵynynda ómir súrip jatyr. Alaıda olardyń sıfrlyq daǵdylarymen qatar synı oılaý qabiletin, bolyp jatqan oqıǵalardy taldaı bilý jáne óz betinshe sheshim qabyldaý daǵdysyn damytý mańyzdy. Fılosofıa jas adamnyń óz is-áreketine oı júgirtýine, qoǵam aldyndaǵy jaýapkershiligin túsinýine jáne ómirlik ustanymdaryn qalyptastyrýyna kómektesedi. Dál osy qasıetter «Adal azamat» qaǵıdattarynyń negizin quraıdy», – dedi Almaty qalasy Jastar saıasaty basqarmasynyń basshysy Azız Kajdenbek.
Baǵdarlamanyń jeke bir bóligi jasandy ıntellekt máselelerine arnaldy. Ǵalymdar onyń bilim alý tásilderine yqpalyn, jańa tehnologıany qoldaný barysynda týyndaýy múmkin qaýip-qaterlerdi jáne sıfrlandyrý jaǵdaıynda derbes oılaý qabiletin saqtaýdyń mańyzyn talqylady.
Kongres aıasynda túrki jáne dala fılosofıasy, ǵylymı zertteýler, sondaı-aq bilim berý júıesindegi fılosofıalyq oılaý mádenıetine arnalǵan taqyryptyq alańdar da jumys istep jatyr.
Azız Kajdenbektiń aıtýynsha, mundaı zıatkerlik alańdardy tek ǵylymı konferensıa sheńberinde ǵana emes, odan tys jerlerde de damytyp, stýdentter men jas mamandardy keńinen tartý mańyzdy.
Kongres 3–19 qarasha aralyǵynda Qazaqstannyń birneshe qalasynda ótedi. Almatydan bólek, is-sharalar Astana, Qaraǵandy, Qostanaı, Óskemen jáne basqa da qalalarda josparlanǵan. Baǵdarlama aıasynda fılosofıalyq esseler baıqaýy, jas ǵalymdarmen kezdesýler men zıatkerlik oıyndar da qarastyrylǵan.
