Almatyda qoǵamdyq keńistikterdi damytýǵa baǵyttalǵan keshendi baǵdarlama aıasyndaǵy jumystar jalǵasýda. Bıylǵy alǵashqy jartyjyldyqtyń qorytyndysy boıynsha toǵyz nysandaǵy negizgi kórkeıtý jumystary aıaqtaldy. Sonymen qatar, qalanyń iri aýmaqtaryn kóriktendirý jalǵasyp, jańa jobalar iske asyryla bastady. Bul týraly Almaty qalasynyń Qoǵamdyq keńistikterdi damytý basqarmasynyń ókilderi habarlady.
Qazirgi tańda Dostyq dańǵyly, Pýshkın kóshesi, Saıran kóliniń jaǵalaýy, Geologtar aleıasy, «Ońtústik» saıabaǵy, Baým toǵaıy, FLOW PARK, Respýblıka alańy jáne «Atakent» İskerlik yntymaqtastyq ortalyǵy aldyndaǵy alań paıdalanýǵa daıyndaldy. Qazir bul nysandarda sońǵy árleý jáne túzetý jumystary júrgizilýde.
Kórkeıtý barysynda júrginshiler aımaqtary jańartylyp, syrtqy jaryqtandyrý júıeleri men avtomatty sýarý júıeleri ornatyldy. Sondaı-aq kógaldandyrý jumystary júrgizilip, shaǵyn sáýlettik nysandar, balalar jáne sport alańdary, zamanaýı demalys aımaqtary salyndy. Nysandardyń tehnıkalyq daıyndyǵy turǵyndardyń olardy qazirdiń ózinde serýendeý jáne demalý úshin paıdalanýyna múmkindik beredi.
Sonymen qatar, kórkeıtý baǵdarlamasynyń kelesi kezeńderi de jalǵasýda. 2026 jyldyń sońyna deıin Tuńǵysh Prezıdent saıabaǵyn qaıta jańǵyrtý, sondaı-aq Tımırázev, Másanchı, Seıfýllın, Jarokov, Jandosov, Rozybakıev, Sátbaev kósheleri men Abaı dańǵylyn kórkeıtý josparlanǵan. Al N. Sas atyndaǵy bplalar men jasóspirimder teatry mańyndaǵy skverdi kóriktendirý jumystary tamyz aıynyń sońyna deıin aıaqtalmaq.
Budan bólek, balalarǵa arnalǵan Ǵylym mýzeıiniń qurylysy júrip jatyr. Nysandy bıylǵy jyldyń sońyna deıin paıdalanýǵa berý josparlanǵan.
Qalada qoǵamdyq keńistikterdi damytýǵa arnalǵan jańa jobalar da bastaý aldy. Sonyń biri Áýejaı kóli aýmaǵyn qaıta jańǵyrtý. Bul jerde turǵyndarǵa arnalǵan zamanaýı demalys aımaǵyn qurý kózdelgen. Jańa jobalar qalalyq ortanyń sapasyn arttyrýǵa, demalys ınfraqurylymyn damytýǵa jáne jaıly qoǵamdyq keńistikter qalyptastyrýǵa baǵyttalǵan.
Qoǵamdyq keńistikterdi damytý basqarmasynyń málimetinshe, barlyq nysanda qurylys-montaj jumystarynyń barysyna, tartylǵan tehnıka men jumysshylar sanyna kún saıyn baqylaý júrgiziledi. Bul jobalardyń belgilengen merzimde aıaqtalýyn qamtamasyz etýge múmkindik beredi.
