Búgin Almatyda «Taza Qazaqstan» respýblıkalyq ekologıalyq aksıasy aıasynda jalpyqalalyq senbilik ótti, - dep habarlaıdy alnews.
Tazalyq jáne kórkeıtý jumystary qalanyń barlyq aýdanyndaǵy segiz aýmaqty qamtydy. Bul týraly Almaty qalasynyń Komýnaldyq ınfraqurylym jáne turǵyn úı ınspeksıasy basqarmasynyń ókilderi habarlady.
Senbilikke 1 860 adam qatysty. Tazalyq jumystaryn júrgizýge 111 arnaıy tehnıka jumyldyryldy.
Senbilikke qatysýshylar Qurmanǵazy jáne Baıseıitova kósheleriniń qıylysyndaǵy «Otan uldaryna máńgilik taǵzym» eskertkishi mańyn, Altyn besik jáne Kókshoqy shaǵynaýdandaryn, Alma-Arasan kóshesin, «Gúlder» saıabaǵyn, Keńsaı-3 aýmaǵyn, sondaı-aq Sábdenov jáne Buqtyrma kóshelerin tazalap, retke keltirdi.
Senbilik qorytyndysy boıynsha 968 tekshe metr qoqys pen qaldyq jınalyp, shyǵaryldy.
Almatyda qalalyq aýmaqtardy kútip ustaý jáne kórkeıtý jumystary aıasynda jalpyqalalyq senbilikter turaqty túrde ótkizilip keledi.
