Almatyda «Taza Qazaqstan» baǵdarlamasy aıasynda qalalyq aýmaqtardy sándik gúldermen kóriktendirý baǵytynda keshendi jumystar júrgizilýde. Bul týraly qalalyq ekologıa jáne qorshaǵan orta basqarmasynyń ókilderi aıtty, - dep habarlaıdy alnews.
2026 jyly sándik gúldermen kógaldandyrylatyn aýmaqtyń jalpy kólemi 387 953 sharshy metr boldy, bul 2025 jylmen salystyrǵanda 77 paıyzǵa artyq. Onyń 107 836 sharshy metri (28%) birjyldyq gúlzarlarǵa, al 280 117 sharshy metri (72%) kópjyldyq gúlzarlar men gúldeıtin sándik butalarǵa tıesili. Sonymen qatar 9 844 tik kógaldandyrý elementin ornalastyrý kózdelgen.
Gúl kompozısıalary júrginshiler aımaqtary boıyna, iri kósheler men dańǵyldarǵa, sondaı-aq saıabaqtar men skverlerge otyrǵyzylmaq. Atalǵan baǵdarlama qalanyń barlyq aýdanyn qamtyp, qalalyq keńistikti kógaldandyrýda birizdi, úılesimdi tásil qalyptastyrýǵa baǵyttalǵan.
Baǵdarlamanyń mańyzdy baǵyttarynyń biri – kólik jolaıyryqtary, negizgi kósheler men bólgish jolaqtardy tik kógaldandyrý. Bul qalalyq ınfraqurylymnyń kórkemdik kelbetin jaqsartyp, ekologıalyq turaqtylyǵyn arttyrýǵa yqpal etedi.
Jospar aıasynda birjyldyq gúl kóshetterinen gúlzarlar jasaý, raýshan baqtaryn qalyptastyrý, sándik gúldeıtin butalardy otyrǵyzý, qyzǵaldaq egý jáne olardy kútip-baptaý jumystary júrgiziledi.
Atalǵan is-sharalardy júzege asyrý qorshaǵan ortanyń jaǵdaıyn jaqsartyp, qala turǵyndary men qonaqtary úshin jaıly da kórkem orta qalyptastyrýǵa múmkindik beredi.
