Almatyda uıaly baılanys, SIM-karta jáne ınternet bolmaǵan jaǵdaıda da adamnyń ornalasqan jeri týraly málimetti qutqarýshylarǵa jetkizýge múmkindik beretin SOS batyrmasy bar AG Tag jeke qurylǵysyna negizdelgen qaýipsizdik júıesi ázirlenip, synaqtan ótkizilip jatyr, - dep habarlaıdy alnews.
AG Digital KZ kompanıasynyń bul jobasy Almatynyń Sıfrlandyrý basqarmasynyń qatysýymen júzege asyrylýda.
Jańa qaýipsizdik júıesi taýly jáne jetýi qıyn aımaqtardaǵy izdestirý-qutqarý jumystarynyń tıimdiligin arttyrýǵa baǵyttalǵan. Qutqarý qyzmetteriniń málimetinshe, jyl saıyn Almaty taýlarynda 1 000-nan astam izdestirý-qutqarý jumysy júrgiziledi. Alaıda kóptegen týrısik baǵytta uıaly baılanys jelisimen qamtylmaǵan aýmaqtar bar. Bul kómekke muqtaj adamdardyń naqty ornalasqan jerin anyqtaýdy qıyndatady.
AG Tag qurylǵysy spýtnıktik navıgasıa arqyly adamnyń koordınattaryn ózdiginen anyqtap, olardy radıobaılanys arqyly qutqarý qyzmetiniń bazalyq stansıasyna jiberedi. Derekter ár eki sekýnd saıyn jańartylyp otyrady. Al tótenshe jaǵdaı týyndaǵan kezde týrıs SOS batyrmasyn bir ret basý arqyly dabyl belgisin jibere alady. Zardap shekken adamnyń koordınattary jedel kezekshiniń elektrondyq kartasynda kórsetiledi. Qazirgi konfıgýrasıada sıgnal taratý qashyqtyǵy 15 shaqyrymǵa deıin jetedi.
Júıe qurylǵymen baılanystyń jaı-kúıin baqylaýǵa, sondaı-aq sıgnal joǵalǵan jaǵdaıda onyń sońǵy ornalasqan jerin tirkeýge múmkindik beredi. Bazalyq stansıa ınternetke jáne uıaly jelilerge qosylmaı-aq avtonomdy rejımde jumys isteı alady.
Joba aıasynda týrıserge jabdyqty eGov Mobile qosymshasyndaǵy QR-kod arqyly berý tetigi de qarastyrylyp jatyr. Saparǵa shyǵar aldynda paıdalanýshy baǵytyn jáne boljamdy qaıtý ýaqytyn tirkep, jeke qurylǵyny ala alady. Al sapar aıaqtalǵannan keıin qurylǵyny qaıtarady.
Almatynyń negizgi týrısik baǵyttarynda jabdyq beretin 12 pýnkt ashý kózdelgen. Olardyń qatarynda Alma-Arasan, Aıýsaı, Medeý, Kimasar, Kókjaılaý, Butaqty jáne Shymbulaq bar.
Búginde júıe Almatynyń alty taýly baǵytynda, sonyń ishinde Týrıs, Panorama, Býkreev jáne Fýrmanov shyńdary men Úlken Almaty kóli mańynda synaqtan ótti. Tekserý jumystary ártúrli aýa raıy jaǵdaıynda, onyń ishinde bıik taýly aımaqtarda júrgizildi.
Sonymen qatar Almatynyń Qutqarý qyzmetimen jáne QR TJM Respýblıkalyq jedel-qutqarý jasaǵymen birlesken synaqtar ótkizildi. Synaqtar uıaly baılanys jelisi joq aýmaqtarda da júrgizildi. Tekserý nátıjesinde júıeniń jumys isteý qabileti rastaldy. Qazirgi ýaqytta odan ári synaqtan ótkizý úshin qurylǵylardyń alǵashqy partıasy daıyndaldy.
2026 jyldyń sońyna deıin Almatynyń týrıseri men álpınısik qaýymdastyqtarynyń qatysýymen pılottyq synaqtardy bastaý josparlanyp otyr. Jobaǵa Almatynyń Tótenshe jaǵdaılar departamenti, Álpınızm federasıasy jáne qalanyń vızıt-ortalyqtary qatysady.
Aldaǵy ýaqytta bul tehnologıany Almaty taýlarynda ǵana emes, Qazaqstannyń basqa da týrısik aımaqtary men jetýi qıyn óńirlerinde qoldaný josparlanyp otyr.
