Almaty taý klasteri jobasyn júzege asyrý praktıkalyq kezeńge ótti, - dep habarlaıdy alnews.
«Almaty Tau Management» JSHS málimetinshe, daıyndyq jumystary «Shymbulaq» kýrortynda, sondaı-aq Butaqty jáne Kimasar shatqaldarynda bastaldy.
«Shymbulaqta» eki jańa kótergish — tórt oryndyq aspaly jol men súıretpeli kótergish salynyp jatyr. Olar kýrorttyń ótkizý qabiletin arttyrýǵa, kelýshiler sanyn tıimdi bólýge jáne shańǵy tebý jaılylyǵyn jaqsartýǵa múmkindik beredi.
Butaqty shatqalynda bolashaq aspaly jol stansıalaryna arnalǵan alańdar daıyndalyp, ınjenerlik-geologıalyq zertteýler júrgizilýde. Qurylys tehnıkasynyń júrýi jáne ınjenerlik jelilerdi tartý úshin «Butaqty – 2000 m» baǵyty boıynsha tehnologıalyq jol salý jumystary bastaldy. Bul negizgi qurylys-montaj jumystaryna kirispes buryn atqarylatyn qajetti kezeń. Ol shamamen 2–3 aptaǵa sozylady.
Kimasar shatqalynda bolashaq bazalyq stansıa ornalasatyn qurylys alańy daıyndaldy. Barlyq ýchaskede jasyl jelekter zerttelip jatyr. Mamandar aǵashtardyń qazirgi jaǵdaıy men ornalasýyn tirkep, keıingi jobalaý kezinde tabıǵı landshaftty eskerýge jáne oǵan áserdi barynsha azaıtýǵa mán beredi. Aǵashtardy tańbalaý — olardy zertteý jáne esepke alý rásiminiń bir bóligi.
Eske salaıyq, Almaty taý klasteri «Shymbulaq» pen «Oi-Qaragai» kýrorttaryn aspaly joldar men taý shańǵysy trassalarynyń biryńǵaı júıesi arqyly biriktirýdi kózdeıdi.
Joba ekologıalyq turaqtylyq qaǵıdattaryn eskere otyryp júzege asyrylady. Jer bederine áserdi barynsha azaıtý, ekologıalyq dálizder men sý resýrsyn saqtaý, turaqty ekologıalyq monıtorıń júrgizý jáne ekologıalyq rásimderdi saqtaý qarastyrylǵan.
Kelýshilerdiń qaýipsizdigin qar kóshkininen qorǵaýdyń keshendi júıesi, qutqarý beketteri men medısınalyq pýnktter qamtamasyz etedi. Kólik qoljetimdiligin arttyrý maqsatynda kólik qaldyrýǵa arnalǵan turaqtar, qoǵamdyq kólik, tegin elektr shattldary jáne taý aýmaqtary arasynda qatynaıtyn, onyń ishinde aspaly joldardy qamtıtyn biryńǵaı qozǵalys júıesi josparlanǵan.
Joba jyl boıy sportpen shuǵyldanýǵa jáne belsendi demalysqa, shańǵy mektepterin damytýǵa, buqaralyq is-sharalar ótkizýge jáne nusqaýshylar daıarlaýǵa jaǵdaı jasaıdy. Sondaı-aq qoljetimdi ınfraqurylym, otbasylyq jáne beıimdelgen sport arqyly áleýmettik jáne ınklúzıvti baǵyt saqtalady.
Jobany júzege asyrý bıznes, týrızm, kólik jáne qurylys salalarynyń damýyna serpin berip, 10 myńnan astam jumys ornyn ashýǵa múmkindik beredi. Esep boıynsha, jobanyń ekonomıkalyq tıimdiligi jylyna 500 mlrd teńgeden asady.
