Almatyda qala ákiminiń orynbasary Abzal Núkenov «Taldaý mektebi. Almaty» bilim berý jobasynyń qatysýshylarymen kezdesti. Kezdesý Narxoz Business School alańynda ótip, qazirgi qoǵamdyq qundylyqtar, sheshim qabyldaýdaǵy taldaýdyń róli jáne jastardyń qalany damytýǵa qosatyn úlesi taqyryptaryna arnaldy. Bul týraly qalalyq Jastar saıasaty basqarmasynyń ókilderi habarlady.
İs-sharaǵa taldaý mektebiniń túlekteri, ǵylymı qaýymdastyq ókilderi, joǵary oqý oryndarynyń oqytýshylary, bıznes jáne qoǵamdyq uıymdardyń músheleri qatysty. Qatysýshylar jańa býyn kóshbasshysy qandaı bolýy kerektigin, resýrsqa jaýapkershilikpen qaraý mádenıetin qalyptastyrý joldaryn jáne memlekettik basqarýda taldaýdyń mańyzyn talqylady.
Kezdesýdi ashqan Almaty qalasy ákiminiń orynbasary Abzal Núkenov búginde memlekettiń tabysy tek ekonomıkalyq kórsetkishtermen emes, adamı kapıtaldyń sapasymen, bilim deńgeıimen jáne azamattardyń jaýapkershiligimen ólshenetinin aıtty.
«Taldaý mektebi. Almaty» – jaı ǵana bilim berý baǵdarlamasy emes. Bul derekterge súıene otyryp sheshim qabyldaý mádenıetin qalyptastyratyn, kásibı sarapshylar qaýymdastyǵyn damytatyn jáne Almatynyń ózekti máselelerine qatysty naqty usynystar ázirleıtin biregeı alań», – dedi Abzal Núkenov.
Onyń aıtýynsha, Memleket basshysy aıqyndaǵan qundylyqtar búginde qalanyń jastar saıasatynyń negizgi baǵytyna aınalǵan. «Adal azamat», «Taza Qazaqstan», «Zań jáne tártip» qaǵıdattary «Jasyl el», «Eko-reındjerler», «Azamat», «NarkoSTOP» jobalarynda, óńirlik ǵylymı granttarda jáne «Jastar qatysatyn búdjet» bastamasynda kórinis tapqan. Bul jobalar jastarǵa qoǵamdyq mańyzy bar máselelerdi sheshýge atsalysyp, ıdeıasyn júzege asyrýǵa múmkindik beredi.
Kezdesý barysynda jaýapkershilik, ádildik jáne resýrstardy uqypty paıdalaný mádenıetin qalyptastyrý jaıyna da erekshe nazar aýdaryldy.
Science Hub bilim berý platformasynyń edúkeıtory Gúldana Mámbetova «Adal azamat» tujyrymdamasy jastardyń kúndelikti ómiriniń ajyramas bóligine eriktilik qyzmet, bilim berý, ǵylymı-zertteý jumystary jáne jeke jaýapkershilik arqyly aınala alatynyn aıtty.
«Ádiletti Qazaqstan eń aldymen mádenıetti, bilimdi, jaýapty ári adal azamattardan bastalady», – dedi ol.
Ál-Farabı atyndaǵy QazUÝ janyndaǵy Quqyq ústemdigi jáne jasandy ıntellekt ortalyǵynyń dırektory Dana Baıtuqaeva «Zań jáne tártip» qaǵıdaty sheshimderdi naqty derekterge súıene otyryp qabyldaýdy talap etetinin aıtty. Sondaı-aq, qazirgi tehnologıa tek týyndaǵan máselelerdi sheshýge emes, olardyń aldyn alýǵa da qyzmet etýi qajet ekenin jetkizdi.
Qazirgi jastardyń qundylyqtary týraly IT-kásipker Aıbolat Qulataı da pikir bildirdi. Onyń aıtýynsha, sıfrlyq dáýirde joǵary oqý oryndary bilikti maman ǵana emes, qoǵam aldyndaǵy jaýapkershiligi joǵary azamat tárbıeleýge de basymdyq berýge tıis.
Kezdesý sońynda qatysýshylar «Taldaý mektebi. Almaty» jobasy kásibı bilimin qalanyń ózekti túıtkilderin sheshýge jáne qoǵamdyq mańyzy bar bastamalardy ázirleýge baǵyttaı alatyn jas sarapshylar qaýymdastyǵyn qalyptastyrýǵa yqpal etetinine toqtaldy.
