Almaty qalasy Jastar saıasaty basqarmasynyń qoldaýymen qala aýmaǵyndaǵy stýdenttik jataqhanalarda monıtorıń jumystary bastaldy. Bul sharanyń basty maqsaty — jastardyń turmys jaǵdaıyn zerdeleý, jataqhanalardaǵy áleýmettik-turmystyq ahýaldy jaqsartýǵa baǵyttalǵan usynystar ázirleý jáne bilim alýshylardyń quqyqtarynyń saqtalýyn baqylaý.
Monıtorıń jumystary arnaıy jumys tobynyń qatysýymen júzege asyrylýda. Onyń quramyna Jastar saıasaty basqarmasynyń ókilderimen qatar, joǵary oqý oryndarynyń stýdenttik ózin-ózi basqarý uıymdary men belsendi jastar tartylǵan. Atalǵan top jataqhanalardaǵy sanıtarlyq-gıgıenalyq talaptardyń oryndalý deńgeıin, qaýipsizdik sharalaryn, ınternet jelisiniń sapasyn, oqý bólmeleri men ortaq paıdalanylatyn oryndardyń jaǵdaıyn tekseredi.
Jastar saıasaty basqarmasynyń ókilderi bul bastamanyń basty mindeti — stýdentterdiń turmystyq máselelerin naqty derekter negizinde anyqtap, oqý oryndarymen jáne tıisti mekemelermen birlesip sheshý ekenin atap ótti.
Aldaǵy ýaqytta monıtorıń nátıjeleri boıynsha tıisti usynystar ázirlenip, jataqhana jaǵdaıyn jaqsartýǵa baǵyttalǵan naqty sharalar qabyldanady. Bul jumys — Almaty jastaryna qolaıly ómir súrý jáne bilim alýyna septigin tıgizýge baǵyttalǵan.
