Almaty qalasynda stýdenttik jataqhanalar qurylysy boıynsha jobalyq keńse ınvestorlardy jańa qurylys jáne qoldanystaǵy ǵımarattardy qaıta jańǵyrtý jobalaryna qatysýǵa shaqyrady, - dep habarlaıdy alnews.
Atalǵan bastama memlekettik sýbsıdıalaý baǵdarlamasy aıasynda júzege asyrylyp, stýdentterge arnalǵan zamanaýı ári qoljetimdi jataqhanalar qoryn ulǵaıtýǵa baǵyttalǵan.
Memlekettik sýbsıdıalaý - strategıalyq mańyzy bar salalardy damytýǵa baǵyttalǵan qarjylyq qoldaý tetigi. Almatyda stýdentterdi sapaly ári qoljetimdi jataqhanamen qamtamasyz etý osy baǵdarlamanyń negizgi basymdyqtarynyń biri bolyp tabylady.
Baǵdarlama aıasynda ınvestorlar jańa jataqhana qurylysyn óz qarajaty esebinen júzege asyra alady nemese qoldanystaǵy ǵımarattardy qaıta beıimdep, stýdenttik jataqhana retinde iske qosa alady. Bul rette ınvestorlar úshin turaqty tabys kózi retinde stýdentterdiń turý aqysy qarastyrylǵan, sondaı-aq jataqhana bazasynda komersıalyq keńistikterdi tıimdi paıdalaný múmkindigi bar. Budan bólek, banktik nesıeler boıynsha sýbsıdıa alý, jer telimderin rásimdeý, sondaı-aq qujattardy daıyndaý barysynda tegin zańgerlik keńes pen tolyq súıemeldeý kórsetiledi.
Almaty qalasynda stýdenttik jataqhanalar qurylysyna qoldaý kórsetý maqsatynda qurylǵan jobalyq keńse memlekettik baǵdarlamanyń tıimdi iske asyrylýyn úılestiredi jáne ınvestorlarǵa barlyq kezeńde qoldaý kórsetedi. Búgingi tańda 120-dan astam ınvestordyń jobaǵa qyzyǵýshylyq tanytýy stýdenttik ınfraqurylymdy damytýǵa bıznestiń joǵary suranysyn kórsetedi.
Mekenjaı: Almaty qalasy, Baıtýrsynuly kóshesi, 22k1, 4-qabat
Baılanys nómeri: +7 701 528 28 37 Damır Kýtýmov, jobalyq keńse jetekshisi
Almaty qalasynyń stýdenttik ınfraqurylymyn damytýǵa óz úlesińizdi qosyńyz.
