Almaty qalasynyń Sport basqarmasy sporttyq rezerv sportshylaryn fýnksıonaldyq dıagnostıkadan ótkizý jáne ǵylymı-medısınalyq qoldaý júıesin engizý boıynsha pılottyq jobany júzege asyrýdy bastady, - dep habarlaıdy alnews.
Búginde sportshyny daıarlaý tek jattyǵý men jarysqa qatysýmen shektelmeıdi. Sportshy aǵzasynyń júktemeni qalaı qabyldaıtynyn, qalpyna kelý deńgeıin jáne shamadan tys sharshaý men jaraqat alý qaýpiniń bar-joǵyn anyqtaý da asa mańyzdy. Sondyqtan sport ǵylymynyń zamanaýı jetistikteri álemdik tájirıbede sportshylardy daıarlaýdyń ajyramas bóligine aınalyp otyr.
Baǵdarlama aıasynda sportshylar sporttyq medısına men fýnksıonaldyq dıagnostıkanyń ozyq ádisterin paıdalana otyryp, keshendi tekserýden ótedi. Zertteý barysynda mamandar júrek-qantamyr júıesiniń qyzmetin, tynys alý júıesiniń jaı-kúıin, tózimdilik deńgeıin jáne aǵzanyń fızıkalyq júktemeden keıingi qalpyna kelý qabiletin baǵalaıdy. Ol úshin InBody apparaty arqyly dene quramyn taldaý, elektroensefalografıa (EEG), sondaı-aq naqty ýaqyt rejıminde symsyz elektrokardıografıalyq baqylaýmen júrgiziletin ergospırometrıalyq testileý sıaqty zamanaýı dıagnostıkalyq tehnologıalar qoldanylady.
Joba Trinity Corp sporttyq medısına jáne dıagnostıka ortalyǵynyń bazasynda júzege asyrylýda. Qol jetkizilgen kelisimderdiń nátıjesinde almatylyq sportshylar keshendi medısınalyq tekserýden arnaıy sharttar negizinde ótý múmkindigine ıe boldy. Dıagnostıka sportshylardyń fýnksıonaldyq múmkindikterin obektıvti baǵalaýǵa arnalǵan arnaıy jabdyqtardyń kómegimen júrgiziledi.
Baǵdarlamanyń alǵashqy qatysýshylary sportqa daryndy balalarǵa arnalǵan mamandandyrylǵan mektep-ınternattyń tárbıelenýshileri boldy. Qazirgi ýaqytta 133 jas sportshy tereńdetilgen dıagnostıkalyq tekserýden ótýde. Jyl sońyna deıin joba aıasynda respýblıkalyq jáne halyqaralyq jarystarǵa qatysatyn Almatynyń sporttyq rezervindegi 200-den astam sportshy tekserýden ótedi.
Sporttyq medısına dárigeriniń aıtýynsha, mundaı dıagnostıkanyń basty artyqshylyǵy sportshynyń qazirgi fızıkalyq daıyndyǵyn baǵalaýmen ǵana shektelmeıdi.
«Zamanaýı sporttyq dıagnostıka aǵzanyń shamadan tys sharshaýdyń, qalpyna kelýdiń jetkiliksizdigin jáne sporttyq nátıjelerdiń tómendeýine ne jaraqatqa ákelýi múmkin qaýip-qaterlerdi erte kezeńde anyqtaýǵa múmkindik beredi. Alynǵan málimetter jattyqtyrýshylar men mamandarǵa jattyǵý úderisin neǵurlym tıimdi josparlap, júktemeni ár sportshynyń ereksheligine saı retteýge jáne onyń jaǵdaıyn daıarlyqtyń barlyq kezeńinde baqylaýda ustaýǵa kómektesedi», – deıdi maman.
Joba aıaqtalǵannan keıin onyń nátıjelerine jan-jaqty taldaý júrgizilip, Almaty qalasynyń sporttyq rezerv sportshylaryn ǵylymı qoldaý júıesin odan ári jetildirý baǵyttary qarastyrylady.
