14 qazanda Almaty galereıasynda Shyńǵys Aıtmatovtyń shyǵarmashylyq murasy men aldaǵy 100 jyldyq mereıtoıyna arnalǵan «Arqaý» («Svázýıýshaıa nıt») halyqaralyq kórmesi ashyldy, - dep habarlaıdy alnews.
Ekspozısıaǵa qyrǵyzstandyq sýretshilerdiń 65 týyndysy qoıyldy. Bul týraly Almaty qalasy Mádenıet basqarmasynyń ókilderi aıtty.
Kórmede Qyrǵyz Respýblıkasy Sýretshiler odaǵynyń músheleri Kýbanychbek Ibragımov, Bahramjon Temırov, Sadyk Mýrzakanov jáne Azızbek Sýlaımanov týyndylaryn usyndy.
Sýretshiler kartınasynda Aıtmatov shyǵarmalarynyń sújetin, keıipkerleri men obrazdaryn beınelep, kórermenderge tanys ádebı týyndylarǵa jańasha kózqaraspen qaraýǵa múmkindik beredi.
Kórmeniń ashylý saltanatyna TÚRKSOI halyqaralyq túrki mádenıeti uıymynyń Bas hatshysy, Qyrǵyzstannyń halyq jazýshysy Sultan Raev qatysty. Ol mundaı kórmeler kórermenderdi ártúrli el sýretshileriniń shyǵarmashylyǵymen tanystyryp, Qazaqstan men Qyrǵyzstan arasynda jańa birlesken jobalardy júzege asyrýǵa múmkindik beretinin atap ótti.
Qonaqtar arasynda Qyrǵyz Respýblıkasynyń Almatydaǵy konsýly, TÚRKSOI Bas hatshysy, belgili jáne jas sýretshiler, mádenıet qaıratkerleri men shyǵarmashylyq zıaly qaýym ókilderi de boldy.
Kórme Almaty qalasynyń Mádenıet basqarmasy men TÚRKSOI uıymynyń qoldaýymen, sondaı-aq Qazaqstan men Qyrǵyzstan sýretshiler odaǵynyń atsalysýymen uıymdastyryldy.
Ekspozısıa 2026 jyly 7 qarashaǵa deıin ashyq bolady. Kórmeni seısenbiden jeksenbige deıin saǵat 10:00-den 19:00-ge deıin Dostyq dańǵyly, 44 mekenjaıynda tegin tamashalaýǵa bolady. Dúısenbi – sanıtarlyq kún.
