Almatyda №15 sanatorıalyq úlgidegi mektep-ınternattyń jańa ǵımaraty paıdalanýǵa berildi, - dep habarlaıdy alnews.
Shuǵyla shaǵynaýdanynda ornalasqan bilim berý mekemesi 340 balaǵa arnalǵan. Jańa ǵımarat oqýshylardyń sapaly bilim alýyna ǵana emes, densaýlyǵyn nyǵaıtyp, sportpen shuǵyldanyp, shyǵarmashylyq qabiletin damytýyna qolaıly jaǵdaı jasaýǵa múmkindik beredi.
Mekteptiń ashylý rásimine Almaty qalasy Bilim basqarmasy basshysynyń orynbasary Aıdyn Saılaýbaı men Naýryzbaı aýdany ákiminiń orynbasary Aınur Bekjanova qatysty. Qonaqtar bilim oshaǵynyń tarıhymen, oqý-tárbıe jumysymen, materıaldyq-tehnıkalyq bazasymen jáne jańa ǵımarattyń múmkindikterimen tanysty.
Keshenniń jalpy aýmaǵy 17 543 sharshy metr. Munda zamanaýı qural-jabdyqtarmen jáne ınteraktıvti paneldermen jabdyqtalǵan 28 oqý kabıneti bar. Sonymen qatar ınformatıka, sıfrlyq saýattylyq, robototehnıka, hımıa, fızıka jáne bıologıa pánderine arnalǵan arnaıy kabınetter qarastyrylǵan.
Oqýshylardyń dene shynyqtyrýyna da erekshe kóńil bólingen. Mektepte sport zaly, baseın jáne stadıon bar. Ekskýrsıa barysynda oqýshylar qonaqtarǵa sporttyq sheberligin kórsetti.
İs-sharanyń arnaıy qonaǵy Sıdneı Olımpıadasynyń chempıony Bekzat Sattarhanovtyń anasy Syrlykúl Shoıbekova boldy. Ol jas sportshylardy quttyqtap, bıik belesti baǵyndyryp, jańa jeńiske umtylýǵa shaqyrdy.
Mekteptegi is-shara shyǵarmashylyq ónerpazdardyń qoıylymdarymen de jalǵasty. Akt zalynda oqýshylar «Ybyraı jaqqan bilim shyraǵy» atty sahnalyq qoıylym usyndy. Al mýzyka jáne bı úıirmeleriniń músheleri shaǵyn konserttik baǵdarlama ázirledi.
Jańa keshende shyǵarmashylyq sheberhanalar, 220 oryndyq akt zaly jáne amfıteatr da bar. Balalardyń qaýipsizdigin qamtamasyz etý úshin beınebaqylaý jáne Face ID júıeleri ornatylǵan. Sondaı-aq zamanaýı asqana jumys isteıdi.
Ǵımarat múmkindigi shekteýli adamdar úshin de tolyqtaı beıimdelgen.
Jańa ǵımarattyń ashylýymen mektep ujymy men oqýshylardy quttyqtaǵan Naýryzbaı aýdany ákiminiń orynbasary Aınur Bekjanova memleket tarapynan óskeleń urpaqtyń jan-jaqty damýyna qajetti jaǵdaı jasaýǵa erekshe kóńil bólinetinin atap ótti.
«Búgin barshamyz úshin erekshe ári qýanyshty kún. №15 sanatorıalyq úlgidegi mektep-ınternattyń jańa ǵımaraty balalarǵa esigin aıqara ashyp, sapaly bilim alyp, jan-jaqty damýyna múmkindik berip otyr. Bul oqýshylar bilim alyp qana qoımaı, densaýlyǵyn nyǵaıtyp, shyǵarmashylyq jáne sporttyq qabiletin shyńdaı alatyn zamanaýı bilim berý ortasy», – dedi ol.
Onyń aıtýynsha, mektep jańa oqý jylyn zamanaýı ınfraqurylymmen jáne oqýshylardyń jaıly bilim alýyna qajetti barlyq jaǵdaımen bastap otyr. Endigi mindet – osy múmkindikti tıimdi paıdalanyp, ár balanyń qabiletin ashýǵa jaǵdaı jasaý.
«Ustazdar qaýymyna eńbegine jemis, al oqýshylarymyzǵa sapaly bilim, zor densaýlyq jáne bıik jetistikter tileımin», – dedi Naýryzbaı aýdany ákiminiń orynbasary.
